ഇന്ത്യൻ ക്രിക്കറ്റിലെ ഇതിഹാസ തുല്യരായ രാഹുൽ ദ്രാവിഡിന്റെയും വീരേന്ദർ സെവാഗിന്റെയും മക്കൾ ഒരുമിച്ച് ദേശീയ അണ്ടർ-19 ടീമിൽ കളത്തിലിറങ്ങുന്നു. ഓസ്‌ട്രേലിയൻ അണ്ടർ-19 ടീമിനെതിരായ ഏകദിന പരമ്പരയ്ക്കുള്ള ഇന്ത്യൻ ടീമിലേക്കാണ് അൻവെയ് ദ്രാവിഡും ആര്യവീർ സെവാഗും തെരഞ്ഞെടുക്കപ്പെട്ടത്. സെപ്റ്റംബർ 18-നാണ് ഓസ്‌ട്രേലിയക്കെതിരെയുള്ള മത്സര പരമ്പരയ്ക്ക് തുടക്കമാകുന്നത്. പര്യടനത്തിൽ മൂന്ന് ഏകദിന മത്സരങ്ങളും രണ്ട് മൾട്ടി-ഡേ ടെസ്റ്റ് മത്സരങ്ങളുമാണ് ഇന്ത്യ കളിക്കുക.

ഏകദിന ടീമിന്റെ നായകനായി ലക്ഷ്യ റായ്ചന്ദനിയെയും ടെസ്റ്റ് ടീമിന്റെ ക്യാപ്റ്റനായി യാഷ്‌വർധൻ സിങ് ചൗഹാനെയും നിശ്ചയിച്ചു. ടെസ്റ്റ് സ്ക്വാഡിൽ വിക്കറ്റ് കീപ്പർ ബാറ്ററായ മലയാളി താരം മാനവ് കൃഷ്ണയും സ്ഥാനം നേടിയിട്ടുണ്ട്.

ഡൽഹി അണ്ടർ-19 ടീം താരമായ ആര്യവീർ സെവാഗ്, 2024 കൂച്ച് ബെഹാർ ട്രോഫിയിൽ മേഘാലയക്കെതിരെ 309 പന്തുകൾ നേരിട്ട് 297 റൺസ് കുറിച്ച് ട്രിപ്പിൾ സെഞ്ച്വറിയുടെ വക്കോളമെത്തി ശ്രദ്ധ നേടിയിരുന്നു. കൂടാതെ 2025-ലെ ഇതേ ടൂർണമെന്റിൽ ആകെ 496 റൺസും താരം സ്കോർ ചെയ്തു. വിക്കറ്റ് കീപ്പർ ബാറ്ററായ അൻവെയ് ദ്രാവിഡ് കഴിഞ്ഞ ജൂലൈയിൽ ശ്രീലങ്കൻ അണ്ടർ-19 ടീമിനെതിരെ വെറും 67 പന്തിൽ 87 റൺസടിച്ച് മികവ് തെളിയിച്ചിരുന്നു. വിനൂ മങ്കാദ് ട്രോഫിയിലെ ആറ് ഇന്നിംഗ്സുകളിൽ നിന്നായി 220 റൺസും അൻവെയ് നേടിയിട്ടുണ്ട്.