കളിക്കളത്തിലെ മോശം പെരുമാറ്റത്തിന് ഇന്ത്യൻ യുവ ഓപ്പണർ യശസ്വി ജയ്സ്വാളിനെതിരെ ചുമത്തിയ ശിക്ഷ വളരെ കുറഞ്ഞുപോയെന്ന് മുൻ ഇന്ത്യൻ ക്രിക്കറ്റ് താരം സഞ്ജയ് മഞ്ജരേക്കർ. മൈതാനത്തെ അച്ചടക്കലംഘനങ്ങൾക്കെതിരെ ശക്തമായ നടപടികൾ സ്വീകരിക്കുന്നതിൽ ബി.സി.സി.ഐയും ഐ.സി.സിയും തികഞ്ഞ അനാസ്ഥ കാണിക്കുന്നുവെന്നും അദ്ദേഹം കുറ്റപ്പെടുത്തി. യുവതാരങ്ങളായ യശസ്വി ജയ്സ്വാൾ, വൈഭവ് സൂര്യവംശി എന്നിവർ ഗ്രൗണ്ടിൽ പ്രകടിപ്പിച്ച മോശം പെരുമാറ്റങ്ങൾക്ക് നിസ്സാരമായ ശിക്ഷ മാത്രം നൽകി ഒഴിവാക്കുന്നത് തെറ്റായ സന്ദേശമാണ് നൽകുന്നതെന്ന് മഞ്ജരേക്കർ ചൂണ്ടിക്കാണിച്ചു.
ആദ്യം ഇന്ത്യ എ ടീമിൽ വൈഭവ് സൂര്യവംശിയും ഇപ്പോൾ ദേശീയ ടീമിൽ ജയ്സ്വാളും അച്ചടക്കമില്ലായ്മ കാണിച്ചിട്ടും ചെറിയ പിഴയിൽ ഒതുക്കി വിടുന്നത് ഇത്തരം പിഴവുകൾ ആവർത്തിക്കാനുള്ള പ്രോത്സാഹനമായി മാറുമെന്നും അദ്ദേഹം വ്യക്തമാക്കി. ഇത് കായികരംഗത്തിന് ദോഷകരമാണെന്ന് മാത്രമല്ല, ഈ യുവതാരങ്ങളുടെ ഭാവിയെത്തന്നെ അപകടത്തിലാക്കുമെന്നും മഞ്ജരേക്കർ പ്രതികരിച്ചു.
ശ്രീലങ്കയ്ക്കെതിരായ ടെസ്റ്റ് മത്സരത്തിൽ പുറത്തായി ഡ്രസ്സിംഗ് റൂമിലേക്ക് തിരികെ നടക്കവേ ലങ്കൻ ഫാസ്റ്റ് ബൗളർ അസിത ഫെർണാണ്ടോയുമായി ജയ്സ്വാൾ വാക്കേറ്റത്തിൽ ഏർപ്പെടുകയും തലകൊണ്ട് ഇടിക്കാൻ തുനിയുകയും ചെയ്തിരുന്നു. ഗ്രൗണ്ടിലെ വാഗ്വാദം കായികമായ ആക്രമണത്തിന്റെ വക്കോളമെത്തിയിട്ടും മാച്ച് ഫീയുടെ 25 ശതമാനം പിഴയും ഒരൊറ്റ ഡിമെറിറ്റ് പോയിന്റും മാത്രമാണ് ഐ.സി.സി ശിക്ഷയായി വിധിച്ചത്.
സമാനമായ സംഭവം കഴിഞ്ഞ ജൂണിൽ നടന്ന ഇന്ത്യ എ - ശ്രീലങ്ക എ മത്സരത്തിലും അരങ്ങേറിയിരുന്നു. അന്ന് ശ്രീലങ്കൻ താരം വിഷൻ ഹലാംബഗെയെ വൈഭവ് സൂര്യവംശി പിടിച്ചുതള്ളിയെങ്കിലും മാച്ച് ഫീയുടെ 50 ശതമാനം പിഴയടച്ച് താരം വലിയ നടപടികളിൽ നിന്ന് രക്ഷപ്പെടുകയായിരുന്നു.
