കോഴിക്കോട്: കേന്ദ്ര മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെതിരെയുള്ള വിജിലൻസ് അന്വേഷണ നീക്കങ്ങളിൽ പ്രതികരണവുമായി മുൻ മന്ത്രിയും ഭരണപരിഷ്കാര കമ്മീഷൻ അധ്യക്ഷനുമായ എം.കെ. മുനീർ. 2006-ൽ എഞ്ചിനീയർ ലീ സീ ബീൻ എഴുതിവെച്ച ആത്മഹത്യാക്കുറിപ്പുമായി ബന്ധപ്പെട്ട് പിന്നീട് കാര്യമായ അന്വേഷണങ്ങൾ ഒന്നും നടന്നില്ലെന്നും സംഭവത്തിന്റെ മുഴുവൻ വശങ്ങളും സമഗ്രമായി പരിശോധിക്കപ്പെടണമെന്നും അക്കാലത്ത് പൊതുമരാമത്ത് വകുപ്പ് മന്ത്രിയായിരുന്ന എം.കെ. മുനീർ വ്യക്തമാക്കി.
തങ്ങൾ ഭരിച്ചിരുന്ന സർക്കാരിന്റെ അവസാന ഘട്ടത്തിലാണ് ഗ്യാനേഷ് കുമാർ പിഡബ്ല്യുഡി സെക്രട്ടറിയുടെ പദവിയിലെത്തുന്നത്. ലീ സീ ബീനിന്റെ ആത്മഹത്യയിൽ നിഷ്പക്ഷമായ അന്വേഷണം അനിവാര്യമാണ്. ആത്മഹത്യാക്കുറിപ്പിൽ എന്തൊക്കെ കാര്യങ്ങളാണ് പരാമർശിച്ചിരുന്നതെന്ന് പുറത്തുവരണം. ഇപ്പോൾ പ്രഖ്യാപിച്ചിട്ടുള്ള അന്വേഷണത്തെ താൻ പൂർണ്ണമായി സ്വാഗതം ചെയ്യുന്നു. ജീവനൊടുക്കിയ ലീ സീ ബീൻ തികഞ്ഞ ആത്മാർത്ഥതയോടെ ജോലി ചെയ്തിരുന്ന വ്യക്തിയായിരുന്നു. അദ്ദേഹത്തിന്റെ ബില്ലുകൾ തടഞ്ഞുവെച്ചിരുന്നോ എന്ന കാര്യം പരിശോധിക്കപ്പെടണം. തന്റെ മന്ത്രിസഭയുടെ ഭരണകാലത്ത് അത്തരം ബില്ലുകളൊന്നും തഴയപ്പെട്ടിരുന്നില്ല. മരണത്തിലേക്ക് നയിച്ച പ്രേരണയുണ്ടായിട്ടുണ്ടോ എന്നാണ് കണ്ടെത്തേണ്ടത്. തങ്ങൾക്ക് ശേഷം അധികാരത്തിലേറിയ സർക്കാരായിരുന്നു ആ ഘട്ടത്തിൽ ഈ കേസ് അന്വേഷിക്കേണ്ടിയിരുന്നതെന്നും എം.കെ. മുനീർ കൂട്ടിച്ചേർത്തു.
ഗ്യാനേഷ് കുമാർ പൊതുമരാമത്ത് സെക്രട്ടറിയായി സേവനമനുഷ്ഠിച്ച കാലയളവിൽ അഴിമതി കാട്ടിയെന്ന പരാതി ലഭിച്ചെന്നും പ്രാഥമിക പരിശോധനയിൽ അതിൽ കാമ്പുണ്ടെന്ന് വ്യക്തമായെന്നുമാണ് ആഭ്യന്തര മന്ത്രി രമേശ് ചെന്നിത്തല വ്യക്തമാക്കിയത്. വിഷയത്തിൽ മുഖ്യമന്ത്രിയുമായി ചർച്ച നടത്തിയെന്നും തുടർന്ന് നിയമപരമായ നടപടികളിലേക്ക് കടക്കാൻ വിജിലൻസ് ഡയറക്ടർക്ക് നിർദ്ദേശം നൽകിയെന്നും മന്ത്രി വിശദീകരിച്ചു.
'2006-ൽ ഗ്യാനേഷ് കുമാർ കേരളത്തിൽ പൊതുമരാമത്ത് സെക്രട്ടറിയായിരുന്ന സമയത്താണ് ലോകബാങ്ക് ധനസഹായത്തോടെ 215 കോടി രൂപ ചെലവിട്ട് എംസി റോഡ് പുനർനിർമ്മിക്കാൻ പദ്ധതി തയ്യാറാക്കിയത്. ഒരു മലേഷ്യൻ കമ്പനിയാണ് നിർമ്മാണ കരാർ ഏറ്റെടുത്തത്. പദ്ധതിയുടെ നിർമ്മാണ പ്രവർത്തനങ്ങൾ പുരോഗമിക്കവെ പ്രോജക്ട് എഞ്ചിനീയറായിരുന്ന ലീ സീ ബീൻ ഒട്ടേറെ പരാതികൾ ഉന്നയിക്കുകയും പിന്നീട് മലേഷ്യയിൽ വെച്ച് ജീവനൊടുക്കുകയുമായിരുന്നു.
തന്റെ ആത്മഹത്യാക്കുറിപ്പിൽ ഗ്യാനേഷ് കുമാറിനെക്കുറിച്ച് അദ്ദേഹം കൃത്യമായി പരാമർശിച്ചിട്ടുണ്ട്. അന്നത്തെ വിജിലൻസ് വിഭാഗം ഇക്കാര്യങ്ങൾ പരിശോധിച്ചെങ്കിലും ഭരണമാറ്റം ഉണ്ടായതോടെ അന്വേഷണം മുന്നോട്ടുപോയില്ല. വിഷയം വിശദമായി അന്വേഷിക്കണമെന്ന് ആവശ്യപ്പെട്ട് മലയിൻകീഴ് വേണുഗോപാലാണ് പരാതി നൽകിയത്. പരാതിയിൽ കഴമ്പുണ്ടെന്ന് വ്യക്തമായതോടെ മുഖ്യമന്ത്രിയുമായി കൂടിയാലോചിച്ച് നടപടികളിലേക്ക് നീങ്ങാൻ വിജിലൻസ് ഡയറക്ടർക്ക് നിർദ്ദേശം നൽകുകയായിരുന്നു. പൂർണ്ണമായും മൂടിവെക്കപ്പെട്ട ഒരു കേസായിരുന്നു ഇത്. അച്യുതാനന്ദൻ സർക്കാർ ഭരണം ഏറ്റെടുത്തതോടെ ഗ്യാനേഷ് കുമാറിന് സ്ഥലംമാറ്റം ലഭിക്കുകയും അദ്ദേഹം ഡൽഹിയിലേക്ക് പോവുകയും ചെയ്തു. ഇപ്പോൾ ലഭിച്ചിരിക്കുന്ന പരാതി ഗ്യാനേഷ് കുമാറിനെതിരെയാണ്, ഏതെല്ലാം വിഷയങ്ങളാണ് അന്വേഷിക്കേണ്ടതെന്ന് വിജിലൻസ് തീരുമാനിക്കും', എന്ന് രമേശ് ചെന്നിത്തല ചൂണ്ടിക്കാട്ടി.
രണ്ട് പതിറ്റാണ്ട് മുൻപ് അവസാനിപ്പിച്ച കെഎസ്ടിപി (KSTP) അഴിമതി ആരോപണ കേസിലാണ് പുനരന്വേഷണം നടത്താൻ ആഭ്യന്തര മന്ത്രി ഇപ്പോൾ ഉത്തരവിട്ടിരിക്കുന്നത്. ഇതോടെ ഗ്യാനേഷ് കുമാറിനെതിരെ വിജിലൻസ് അന്വേഷണം നിലവിൽ വരും. മുൻപ് തീർപ്പാക്കിയ ഫയലുകൾ വീണ്ടും തുറന്ന് പരിശോധിക്കാനാണ് സർക്കാരിന്റെ തീരുമാനം.
