തിരുവനന്തപുരം: മുൻ സിപിഐഎം സംസ്ഥാന സെക്രട്ടറിയും പോളിറ്റ് ബ്യൂറോ അംഗവുമായിരുന്ന കോടിയേരി ബാലകൃഷ്ണന്റെ സ്മരണകൾ പുതുക്കി സിപിഐഎം സംസ്ഥാന സെക്രട്ടറി എം.വി. ഗോവിന്ദൻ. കോടിയേരിയുടെ വിയോഗം കമ്മ്യൂണിസ്റ്റ് പ്രസ്ഥാനത്തിന് ഉണ്ടാക്കിയ വിടവ് വാക്കുകൾക്ക് അതീതമാണെന്ന് അദ്ദേഹം തന്റെ ഫേസ്ബുക്ക് കുറിപ്പിൽ വ്യക്തമാക്കി.
ഏതൊരു കടുത്ത പ്രതിസന്ധിയെയും തരണം ചെയ്ത് കമ്മ്യൂണിസ്റ്റ് പ്രസ്ഥാനത്തെ സുശക്തമാക്കിയ നേതാവാണ് കോടിയേരി ബാലകൃഷ്ണൻ. എപ്പോഴും സാധാരണ ജനങ്ങൾക്കിടയിൽ പ്രവർത്തിച്ച അദ്ദേഹം, തന്റെ സ്നേഹോഷ്മളമായ ഇടപെടലുകളിലൂടെ എല്ലാവരുടെയും പ്രിയങ്കരനായി മാറി. രോഗബാധയുടെ കഠിനമായ ബുദ്ധിമുട്ടുകൾ പോലും അവഗണിച്ച് പാർട്ടിക്കായി ഒടുക്കം വരെ നിലകൊണ്ട വിപ്ലവകാരിയായിരുന്നു കോടിയേരിയെന്നും എം.വി. ഗോവിന്ദൻ അനുസ്മരിച്ചു.
സാധാരണക്കാരോടൊപ്പം അണിനിരന്ന് അവരുടെ ജനകീയ പ്രശ്നങ്ങൾ ഏറ്റെടുത്ത് മുന്നോട്ടുപോകാൻ സഖാവ് കോടിയേരിയുടെ ഓർമ്മകൾ എന്നും പ്രചോദനമായിരിക്കുമെന്നും, ആ അനശ്വര സ്മരണകൾക്ക് മുന്നിൽ രക്തപുഷ്പങ്ങൾ അർപ്പിക്കുന്നുവെന്നും അദ്ദേഹം കൂട്ടിച്ചേർത്തു.
