കൊച്ചി: ലൈവ് സ്ട്രീമിംഗിലൂടെ യുവതിയെ അപകീർത്തിപ്പെടുത്തിയെന്ന കേസിൽ ഒളിവിൽ കഴിഞ്ഞുവരികയായിരുന്ന പ്രമുഖ യൂട്യൂബർ തൊപ്പി എന്ന മുഹമ്മദ് നിഹാദിന് ഹൈക്കോടതി മുൻകൂർ ജാമ്യം അനുവദിച്ചു. പരാതിക്കാരിക്ക് നേരെ നേരിട്ട് അശ്ലീല പരാമർശങ്ങൾ നടത്തിയതായി കാണാൻ കഴിയുന്നില്ലെന്ന നിരീക്ഷണത്തോടെയാണ് ജസ്റ്റിസ് കൗസർ എടപ്പഗത്ത് കർശന നിബന്ധനകളോടെ ജാമ്യം നൽകിയത്. ആരോപണങ്ങളുടെ വ്യാപ്തി കണക്കിലെടുക്കുമ്പോൾ പ്രതിയെ കസ്റ്റഡിയിൽ വെച്ച് ചോദ്യം ചെയ്യേണ്ട അടിയന്തര സാഹചര്യമില്ലെന്നും അതിനാൽ മുൻകൂർ ജാമ്യം നൽകാമെന്നും കോടതി വ്യക്തമാക്കി.
തന്റെ മുൻകൂർ അനുവാദമില്ലാതെ ചിത്രങ്ങളും ദൃശ്യങ്ങളും പ്രദർശിപ്പിക്കുകയും, സ്ത്രീത്വത്തെ അപമാനിക്കുന്ന തരത്തിൽ അധിക്ഷേപകരമായ ലൈംഗിക പരാമർശങ്ങൾ നടത്തുകയും ചെയ്തുവെന്നാണ് യുവതി പരാതിപ്പെട്ടത്. ഈ കേസിൽ മഞ്ചേരി ജില്ലാ സെഷൻസ് കോടതി മുൻകൂർ ജാമ്യാപേക്ഷ തള്ളിയതിനെത്തുടർന്നാണ് നിഹാദ് ഹൈക്കോടതിയെ സമീപിച്ചത്. ഒരു ലക്ഷം രൂപയുടെ ബോണ്ടും തുല്യ തുകയ്ക്കുള്ള രണ്ട് ആൾജാമ്യവുമാണ് ജാമ്യത്തിലെ പ്രധാന വ്യവസ്ഥ.
അന്വേഷണ നടപടികളുമായി പൂർണ്ണമായും സഹകരിക്കണം, തുടർ ഉത്തരവുണ്ടാകുന്നത് വരെ എല്ലാ ശനിയാഴ്ചകളിലും രാവിലെ അന്വേഷണ ഉദ്യോഗസ്ഥന് മുന്നിൽ ഹാജരാകണം, ജാമ്യകാലയളവിൽ സമാനമായ കുറ്റകൃത്യങ്ങളിൽ ഏർപ്പെടരുത്, സാക്ഷികളെ സ്വാധീനിക്കാനോ തെളിവുകൾ നശിപ്പിക്കാനോ പാടില്ല, വിചാരണക്കോടതിയുടെ മുൻകൂർ അനുമതി കൂടാതെ കേരളം വിട്ടുപോകരുത് എന്നിവയാണ് മറ്റ് ഉപാധികൾ. കഴിഞ്ഞ ജൂൺ 10-ന് നടത്തിയ ലൈവ് സ്ട്രീമിംഗിനെ മുൻനിർത്തിയാണ് സ്ത്രീത്വത്തെ അപമാനിക്കൽ, ഐടി നിയമത്തിലെ വകുപ്പുകൾ എന്നിവ ചുമത്തി മഞ്ചേരി പോലീസ് നിഹാദിനെതിരെ കേസെടുത്തത്.
സുഹൃത്തുക്കളുടെ അശ്ലീല ദൃശ്യങ്ങൾ സമൂഹമാധ്യമങ്ങൾ വഴി പ്രചരിപ്പിച്ചതുമായി ബന്ധപ്പെട്ട് ഇയാൾക്കെതിരെ പോലീസ് മറ്റൊരു കേസും രജിസ്റ്റർ ചെയ്തിരുന്നു. ഈ കേസിൽ ചോദ്യം ചെയ്യലിന് എത്താൻ ആലുവ റൂറൽ സൈബർ പോലീസ് നോട്ടീസ് നൽകിയെങ്കിലും നിഹാദ് ഒളിവിൽ പോവുകയും തുടർന്ന് പോലീസ് ലുക്കൗട്ട് സർക്കുലർ പുറപ്പെടുവിക്കുകയുമായിരുന്നു. അഡ്വ. ശ്രീജിത്ത് പെരുമന നൽകിയ പരാതിയുടെ അടിസ്ഥാനത്തിലാണ് ആലുവ റൂറൽ സൈബർ പോലീസ് ഐടി നിയമപ്രകാരം നിഹാദിനെതിരെ അന്ന് കേസെടുത്തിരുന്നത്.
