കോഴിക്കോട്: മദ്യലഹരിയിൽ വാഹനം ഓടിച്ച് തുടർച്ചയായി അപകടങ്ങൾ സൃഷ്ടിച്ചെന്ന പരാതിയിൽ പ്രമുഖ യൂട്യൂബർ അശ്വന്ത് കോക്കിനെതിരെ നടക്കാവ് പോലീസ് കേസെടുത്തു. മനുഷ്യജീവന് അപകടമുണ്ടാക്കുന്ന തരത്തിൽ അശ്രദ്ധമായി വാഹനം ഓടിക്കൽ, മദ്യപിച്ച് ഡ്രൈവ് ചെയ്യൽ എന്നീ കുറ്റങ്ങൾ ചുമത്തിയാണ് നടപടി. അറസ്റ്റ് രേഖപ്പെടുത്തിയ ശേഷം ഇയാളെ പിന്നീട് സ്റ്റേഷൻ ജാമ്യത്തിൽ വിട്ടയച്ചു.
തിങ്കളാഴ്ച വൈകുന്നേരം ഏഴ് മണിയോടെ എരഞ്ഞിപ്പാലത്ത് വെച്ചായിരുന്നു അപകട പരമ്പര അരങ്ങേറിയത്. അശ്വന്ത് ഓടിച്ചിരുന്ന താർ ജീപ്പ് റോഡരികിൽ നിർത്തിയിട്ടിരുന്ന കാറിലേക്ക് ഇടിച്ചുകയറുകയായിരുന്നു. തുടർന്ന് രണ്ട് ഇരുചക്രവാഹനങ്ങളിലും വാഹനം ഇടിച്ചു. അപകടം വരുത്തിവെച്ച ശേഷം വാഹനം നിർത്താതെ മുന്നോട്ട് ഓടിച്ചുപോവാനാണ് അശ്വന്ത് ശ്രമിച്ചത്. എന്നാൽ നാട്ടുകാരും ട്രാഫിക് പോലീസും ചേർന്ന് വാഹനം പിന്തുടർന്ന് തടഞ്ഞുനിർത്തുകയായിരുന്നു.
പോലീസ് സ്ഥലത്തെത്തി വാഹനത്തിൽ നിന്ന് പുറത്തിറക്കുമ്പോൾ ഇയാൾ സ്വബോധമില്ലാത്ത അവസ്ഥയിലായിരുന്നു. തുടർന്ന് കോഴിക്കോട് ബീച്ച് ആശുപത്രിയിൽ എത്തിച്ച് നടത്തിയ വൈദ്യപരിശോധനയിൽ അശ്വന്ത് കോക്ക് മദ്യപിച്ചിരുന്നതായി സ്ഥിരീകരിച്ചു. അപകടത്തിൽപ്പെട്ട വാഹനങ്ങളുടെ ഉടമസ്ഥർ നൽകിയ പരാതിയുടെ അടിസ്ഥാനത്തിലാണ് നടക്കാവ് പോലീസ് കേസ് രജിസ്റ്റർ ചെയ്തത്. അറസ്റ്റ് നടപടികൾക്ക് ശേഷം മാധ്യമങ്ങൾ വിവരങ്ങൾ ആരാഞ്ഞെങ്കിലും മദ്യപിച്ചിരുന്നോ എന്ന ചോദ്യത്തിന് വ്യക്തമായ മറുപടി നൽകാൻ അശ്വന്ത് തയ്യാറായില്ല. 'മറുപടി പറയുന്നില്ല' എന്നും 'ദാറ്റ്സ് കേരള പോലീസ്' എന്നുമാണ് മാധ്യമങ്ങളോട് ഇയാൾ പ്രതികരിച്ചത്.
