തിരുവനന്തപുരം: പുതിയ സർക്കാരിന്റെ പ്രഥമ ബജറ്റിന് പിന്നാലെ മുൻഗണനാ വികസന പദ്ധതികളുടെ നിർവ്വഹണ രൂപരേഖ തയ്യാറാക്കാൻ സംഘടിപ്പിച്ച 'റീ ഇമാജിനിങ് കേരളം' പരിപാടിയുടെ പൂർണ്ണ ഏകോപന ചുമതല നിർവ്വഹിച്ചത് ലണ്ടൻ ആസ്ഥാനമായി പ്രവർത്തിക്കുന്ന ബഹുരാഷ്ട്ര കമ്പനിയായ ഗ്രാന്റ് തോൺടൺ.
സംസ്ഥാനത്തിന്റെ തന്ത്രപ്രധാനമായ പദ്ധതികളുടെയും ആശയരൂപീകരണ ചർച്ചകളുടെയും ഏകോപന ചുമതല ഗ്രാന്റ് തോൺടൺ കമ്പനിയിലെ 40 പേരടങ്ങുന്ന സംഘത്തിനായിരുന്നു. അരക്കോടി രൂപ (50 ലക്ഷം രൂപ) ചെലവഴിച്ചാണ് പ്രസ്തുത വിദേശ ഏജൻസിയെ സർക്കാരിന്റെ 'നോളജ് പാർട്ണർ' ആയി നിശ്ചയിച്ചത്. സമാനമായ പരിപാടികൾ സംഘടിപ്പിക്കാൻ ശേഷിയുള്ള സർക്കാർ ഏജൻസികൾ നിലവിലുള്ളപ്പോൾ എന്തിനാണ് സ്വകാര്യ കമ്പനിക്ക് ഈ ചുമതല നൽകിയതെന്നത് ദുരൂഹത സൃഷ്ടിക്കുന്നു. മുൻ ഭരണകാലത്ത് പദ്ധതികൾ പുറംകരാർ (ഔട്ട്സോഴ്സിങ്) നൽകുന്നതിനെതിരെ അതിശക്തമായി ശബ്ദമുയർത്തിയിരുന്ന നേതാവായിരുന്നു മുഖ്യമന്ത്രി വി.ഡി. സതീശൻ. ആ മുൻനിലപാടുകളെല്ലാം മറികടന്നാണ് സർക്കാർ ഇപ്പോൾ സ്വകാര്യ കമ്പനിക്ക് ഔദ്യോഗിക പരിപാടിയുടെ നടത്തിപ്പ് ചുമതല കൈമാറിയത്.
കഴിഞ്ഞ 16, 17, 18 തീയതികളിൽ തലസ്ഥാനത്താണ് 'റീ ഇമാജിനിങ് കേരളം റൗണ്ട് ടേബിൾ കോൺഫറൻസ്' സംഘടിപ്പിച്ചത്. ബജറ്റിൽ വിഭാവനം ചെയ്ത മുൻഗണനാ വികസന പദ്ധതികൾ സമയബന്ധിതമായും ചിട്ടയായും നടപ്പിലാക്കുന്നതിനുള്ള കർമ്മപദ്ധതി രൂപീകരിക്കുകയായിരുന്നു സമ്മേളനത്തിന്റെ ലക്ഷ്യം. വരുന്ന ആറുമാസത്തിനുള്ളിൽ പദ്ധതികൾക്ക് സമഗ്രമായ അന്തിമരൂപം നൽകുമെന്നും രണ്ടു വർഷത്തിനകം ഇവയെല്ലാം കൃത്യമായ ട്രാക്കിലെത്തിക്കുമെന്നും പരിപാടിയിൽ മുഖ്യമന്ത്രി വ്യക്തമാക്കിയിരുന്നു.
