കൊച്ചി: കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ യൂത്ത് കോൺഗ്രസ് നടത്തിയ കരിങ്കൊടി പ്രതിഷേധത്തിന്റെ വീഡിയോ ദൃശ്യങ്ങൾ സമൂഹമാധ്യമങ്ങളിൽ നിന്ന് പിൻവലിച്ചതുമായി ബന്ധപ്പെട്ട വിവാദങ്ങളിൽ വിശദീകരണവുമായി മന്ത്രി ഒ.ജെ. ജനീഷ്. യൂത്ത് കോൺഗ്രസ് സംസ്ഥാന അധ്യക്ഷൻ എന്ന നിലയിലാണ് ദൃശ്യങ്ങൾ പങ്കുവെച്ചതെന്നും, എന്നാൽ ഒരു സംസ്ഥാന മന്ത്രിയുടെ പേരിലുള്ള പേജിലൂടെ ഇത് പ്രചരിക്കുന്നത് തെറ്റിദ്ധാരണകൾക്ക് വഴിവെച്ചേക്കാം എന്നതിനാലാണ് ഒഴിവാക്കിയതെന്നും അദ്ദേഹം വ്യക്തമാക്കി. മുഖ്യമന്ത്രി ആവശ്യപ്പെട്ടതുകൊണ്ടാണ് പോസ്റ്റ് നീക്കം ചെയ്തതെന്ന പ്രചാരണം വാസ്തവവിരുദ്ധമാണെന്നും അദ്ദേഹം അറിയിച്ചു.
'സോഷ്യൽ മീഡിയ കൈകാര്യം ചെയ്യുന്ന അഡ്മിൻ പാനലാണ് പ്രസ്തുത വീഡിയോ പങ്കുവെച്ചത്. യൂത്ത് കോൺഗ്രസ് അധ്യക്ഷൻ എന്ന നിലയിലാണ് ഇത് അക്കൗണ്ടിൽ വന്നതെങ്കിലും, ഒരു ക്യാബിനറ്റ് മന്ത്രിയുടെ പേരിൽ പ്രചരിക്കുന്നത് തെറ്റായ സന്ദേശം നൽകിയേക്കാം എന്ന വിലയിരുത്തലിൽ ഓഫീസ് നേരിട്ട് നിർദ്ദേശം നൽകി അത് പിൻവലിക്കുകയായിരുന്നു. പൊതുപരിപാടികളിൽ പങ്കെടുക്കുന്ന തിരക്കിലായിരുന്നതിനാൽ പോസ്റ്റ് നീക്കം ചെയ്ത വിവരം പെട്ടെന്ന് ശ്രദ്ധയിൽപ്പെട്ടിരുന്നില്ല', എന്ന് ഒ.ജെ. ജനീഷ് വ്യക്തമാക്കി. കേന്ദ്ര ആഭ്യന്തര മന്ത്രിക്കെതിരെയുള്ള കരിങ്കൊടി സമരം യൂത്ത് കോൺഗ്രസ് അഖിലേന്ത്യാ കമ്മിറ്റിയുടെ കൂട്ടായ തീരുമാനപ്രകാരമായിരുന്നുവെന്നും അദ്ദേഹം കൂട്ടിച്ചേർത്തു.
അമിത് ഷായ്ക്കെതിരെ യൂത്ത് കോൺഗ്രസ് സമരം നടത്തിയതിന്റെ പ്രതികാരമായി കേരളത്തിലെ മന്ത്രിമാർക്ക് നേരെ കരിങ്കൊടി കാട്ടുന്ന യുവമോർച്ചയുടെ നടപടി ശുദ്ധ രാഷ്ട്രീയ പാപ്പരത്തമാണെന്ന് മന്ത്രി വിമർശിച്ചു. പോസ്റ്റ് നീക്കം ചെയ്ത വിഷയത്തിൽ തന്നെ കടന്നാക്രമിക്കുന്ന സിപിഐഎമ്മും ഡിവൈഎഫ്ഐയും കേന്ദ്ര ആഭ്യന്തര മന്ത്രി സംസ്ഥാനത്ത് വന്ന് മടങ്ങിയതുപോലും അറിയാതെ ഉറക്കത്തിലായിരുന്നുവെന്നത് പരിഹാസ്യമാണെന്നും അദ്ദേഹം പരിഹസിച്ചു.
കൊല്ലത്ത് വെച്ചായിരുന്നു അമിത് ഷായ്ക്കെതിരെ യൂത്ത് കോൺഗ്രസ് പ്രവർത്തകർ കരിങ്കൊടി ഉയർത്തിയത്. കുണ്ടറയിലെയും അമൃതാനന്ദമയി മഠത്തിലെയും ചടങ്ങുകളിൽ സംബന്ധിക്കാൻ കേന്ദ്രമന്ത്രി എത്തിയപ്പോഴായിരുന്നു പ്രതിഷേധം. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറുമായി ബന്ധപ്പെട്ട് ഉയർന്ന വാർത്തകളുടെ പശ്ചാത്തലത്തിലാണ് യൂത്ത് കോൺഗ്രസ് പ്രവർത്തകർ കരിങ്കൊടി പ്രതിഷേധവുമായി രംഗത്തെത്തിയത്.
