തിരുവനന്തപുരം: സംസ്ഥാനത്ത് ഇന്നും വൈദ്യുതി നിയന്ത്രണം ഏർപ്പെടുത്തില്ലെന്ന് കെഎസ്ഇബി അറിയിച്ചു. ഇന്ന് വൈകുന്നേരം 4 മണി മുതൽ അർദ്ധരാത്രി 12 മണി വരെ 250 മെഗാവാട്ട് അധിക വൈദ്യുതി ഹരിയാനയിൽ നിന്നും, രാത്രി 8 മണി മുതൽ 12 മണി വരെ 200 മെഗാവാട്ട് വൈദ്യുതി സ്വാപ്പ് വ്യവസ്ഥയിൽ ആന്ധ്രാപ്രദേശിൽ നിന്നും ലഭിക്കുമെന്ന് അധികൃതർ വ്യക്തമാക്കി. ഇതോടെ പീക്ക് അവർ സമയത്തെ ഉയർന്ന ആവശ്യകത നേരിടാൻ ആവശ്യമായ വൈദ്യുതി ലഭ്യമാകുമെന്നാണ് കെഎസ്ഇബിയുടെ കണക്കുകൂട്ടൽ. അതിനാൽ ഇന്നും പവർകട്ട് ഒഴിവാക്കാനായിട്ടുണ്ട്. ഇതിനുപുറമെ, സംസ്ഥാനത്ത് വിവിധയിടങ്ങളിൽ മഴ പെയ്തതിനെത്തുടർന്ന് പൊതുവെയുള്ള വൈദ്യുതി ഉപഭോഗത്തിൽ കാര്യമായ കുറവ് രേഖപ്പെടുത്തിയിട്ടുണ്ട്. കഴിഞ്ഞ ദിവസങ്ങളിലും സംസ്ഥാനത്ത് വൈദ്യുതി നിയന്ത്രണം ഏർപ്പെടുത്തിയിരുന്നില്ല.