തിരുവനന്തപുരം: വി.ഡി. സതീശൻ മുഖ്യമന്ത്രിയായി ചുമതലയേറ്റതിന് ശേഷം നടന്ന ആദ്യത്തെ തദ്ദേശ ഉപതെരഞ്ഞെടുപ്പിൽ എൽഡിഎഫിന് മികച്ച മുന്നേറ്റം. ആകെയുള്ള 38 തദ്ദേശ വാർഡുകളിലേക്ക് നടന്ന മത്സരത്തിൽ 18 ഇടങ്ങളിൽ എൽഡിഎഫ് വിജയം ഉറപ്പിച്ചപ്പോൾ യുഡിഎഫിന് 19 സീറ്റുകളിലാണ് ജയിക്കാനായത്. ഉപതെരഞ്ഞെടുപ്പിൽ യുഡിഎഫിന് നേരിടേണ്ടി വന്ന ഈ തിരിച്ചടിയെ മുൻനിർത്തി ഫേസ്ബുക്ക് കുറിപ്പിലൂടെ പ്രതികരണവുമായി രംഗത്തെത്തിയിരിക്കുകയാണ് പി.എ. മുഹമ്മദ് റിയാസ് എംഎൽഎ. 'വിജയത്തെ പോലെ മധുരമുണ്ട് ഈ തോൽവിക്ക്' എന്നാണ് അദ്ദേഹം സമൂഹമാധ്യമത്തിൽ രേഖപ്പെടുത്തിയത്.
സീറ്റുകൾ പിടിച്ചെടുത്ത് എൽഡിഎഫ് ശക്തമായ തേരോട്ടം നടത്തിയെന്നും തദ്ദേശ പോരാട്ടത്തിൽ യുഡിഎഫിന് കനത്ത പ്രഹരമാണ് ഉണ്ടായതെന്നും അദ്ദേഹം ചൂണ്ടിക്കാട്ടി. മുൻപ് മുസ്ലിം ലീഗ് 2273 വോട്ടുകളുടെ ഭൂരിപക്ഷത്തിൽ വിജയിച്ചു കയറിയ കോഴിക്കോട് കോർപ്പറേഷനിലെ കുറ്റിച്ചിറ വാർഡിൽ, ഇത്തവണത്തെ ഉപതെരഞ്ഞെടുപ്പിൽ യുഡിഎഫിന്റെ ഭൂരിപക്ഷം വെറും 436 വോട്ടുകളിലേക്ക് കൂപ്പുകുത്തി.
യുഡിഎഫ് സർക്കാരിന്റെ ജനവിരുദ്ധ ഭരണനടപടികളും, മതേതരത്വ മൂല്യങ്ങളെ തള്ളിപ്പറഞ്ഞ് ബിജെപി രാഷ്ട്രീയത്തോട് സംസ്ഥാന സർക്കാർ പുലർത്തുന്ന മൃദുസമീപനവുമാണ് യുഡിഎഫിന്റെ പരമ്പരാഗത വോട്ടർമാരെപ്പോലും എൽഡിഎഫിലേക്ക് അടുപ്പിച്ചതെന്ന് അദ്ദേഹം വ്യക്തമാക്കി. യുഡിഎഫിന്റെ ഉറച്ച കോട്ടയിൽ ഇത്തരമൊരു മുന്നേറ്റം യാഥാർത്ഥ്യമാക്കിയ സഖാക്കൾക്കും വോട്ടർമാർക്കും വിപ്ലവാഭിവാദ്യങ്ങൾ അർപ്പിക്കുന്നതായും മുഹമ്മദ് റിയാസ് തന്റെ ഫേസ്ബുക്ക് പോസ്റ്റിൽ കൂട്ടിച്ചേർത്തു.
