തിരുവനന്തപുരം: കേന്ദ്ര ആഭ്യന്തര മന്ത്രി അമിത് ഷായ്ക്ക് നേരെ യൂത്ത് കോൺഗ്രസ് നടത്തിയ കരിങ്കൊടി പ്രതിഷേധത്തെച്ചൊല്ലി കോൺഗ്രസ് നേതൃത്വത്തിൽ ആഭ്യന്തര ഭിന്നത അതിരൂക്ഷമാകുന്നു. സമരം പക്വതയില്ലാത്ത നടപടിയായിരുന്നു എന്ന മുൻനിലപാടിൽ ഉറച്ചുനിൽക്കുകയാണ് മുഖ്യമന്ത്രി വി.ഡി. സതീശൻ. കേന്ദ്ര സർക്കാരുമായി നേരിട്ട് ഏറ്റുമുട്ടുന്നത് ബുദ്ധിപരമായ സമീപനമല്ലെന്നാണ് അദ്ദേഹത്തിന്റെ വിലയിരുത്തൽ. എന്നാൽ, യൂത്ത് കോൺഗ്രസ് നീക്കത്തിന് പരസ്യമായ പിന്തുണ പ്രഖ്യാപിച്ചാണ് എഐസിസി ജനറൽ സെക്രട്ടറി കെ.സി. വേണുഗോപാൽ രംഗത്തെത്തിയത്. ഇതിനിടെ, പ്രതിഷേധത്തിന്റെ വീഡിയോ ദൃശ്യങ്ങൾ മന്ത്രി ഒ.ജെ. ജനീഷ് സ്വന്തം സോഷ്യൽ മീഡിയ അക്കൗണ്ടിൽ നിന്ന് പിൻവലിച്ചതും വലിയ രാഷ്ട്രീയ ചർച്ചകൾക്ക് തിരികൊളുത്തിയിട്ടുണ്ട്.
അതേസമയം, കേന്ദ്ര ആഭ്യന്തര മന്ത്രിക്കെതിരെയുണ്ടായ സുരക്ഷാ വീഴ്ചയിലും പ്രതിഷേധത്തിലും പങ്കെടുത്തവർക്കെതിരെ കർശന നടപടി വേണമെന്ന നിലപാടിൽ ബിജെപി ഉറച്ചുനിൽക്കുകയാണ്. ഉത്തരവാദികൾക്കെതിരെ നടപടിയെടുത്തില്ലെങ്കിൽ പ്രക്ഷോഭം പാർട്ടി നേരിട്ട് ഏറ്റെടുക്കുമെന്നാണ് മുന്നറിയിപ്പ്. മുഖ്യമന്ത്രിയെയും മന്ത്രിമാരെയും വഴിയിൽ തടഞ്ഞുകൊണ്ടുള്ള യുവമോർച്ചയുടെ കരിങ്കൊടി സമരം സംസ്ഥാനത്ത് തുടർന്നുപോകാനും ബിജെപി തീരുമാനിച്ചിട്ടുണ്ട്.
യൂത്ത് കോൺഗ്രസ് നടത്തിയ കരിങ്കൊടി പ്രതിഷേധത്തിൽ മുഖ്യമന്ത്രി വി.ഡി. സതീശൻ നേരത്തെ തന്നെ കടുത്ത അതൃപ്തി വ്യക്തമാക്കിയിരുന്നു. സമരം തികച്ചും അനാവശ്യമായിരുന്നുവെന്നാണ് അദ്ദേഹത്തിന്റെ പക്ഷം. കരിങ്കൊടി വീശിയ നടപടി കേന്ദ്ര സർക്കാരിനെ അനാവശ്യമായി പ്രകോപിപ്പിച്ചുവെന്നും അമിത് ഷായ്ക്ക് ഇതിൽ വലിയ അമർഷമുണ്ടെന്നും ചൂണ്ടിക്കാട്ടിയ മുഖ്യമന്ത്രി, കേന്ദ്രത്തെ പ്രകോപിതരാക്കിയത് ഒട്ടും ശരിയായില്ലെന്നും വ്യക്തമാക്കിയിരുന്നു.
മുഖ്യമന്ത്രി പരസ്യമായി വിയോജിപ്പ് പ്രകടിപ്പിച്ചതിന് പിന്നാലെയാണ്, അമിത് ഷായ്ക്കെതിരായ കരിങ്കൊടി പ്രതിഷേധത്തിന്റെ വീഡിയോ ദൃശ്യങ്ങൾ മന്ത്രി ഒ.ജെ. ജനീഷ് തന്റെ സോഷ്യൽ മീഡിയ പേജുകളിൽ നിന്ന് നീക്കം ചെയ്തത്. മുഖ്യമന്ത്രി നൽകിയ കർശന നിർദ്ദേശത്തെ തുടർന്നാണ് ഈ നീക്കമെന്നാണ് ലഭിക്കുന്ന സൂചനകൾ. എന്നാൽ, യൂത്ത് കോൺഗ്രസിന്റെ പ്രതിഷേധത്തിൽ യാതൊരു തെറ്റുമില്ലെന്നായിരുന്നു മന്ത്രി ഒ.ജെ. ജനീഷ് തുടക്കത്തിൽ മാധ്യമങ്ങളോട് പ്രതികരിച്ചിരുന്നത്. മുഖ്യ തെരഞ്ഞെടുപ്പ് കമ്മീഷണർ ഗ്യാനേഷ് കുമാറിനെ മുൻനിർത്തി പുറത്തുവന്ന റിപ്പോർട്ടുകളുടെ പശ്ചാത്തലത്തിലാണ് യൂത്ത് കോൺഗ്രസ് അമിത് ഷായ്ക്കെതിരെ പ്രതിഷേധവുമായി തെരുവിലിറങ്ങിയത്. ഈ പ്രതിഷേധത്തെ പൂർണ്ണമായി ന്യായീകരിച്ചായിരുന്നു കെ.സി. വേണുഗോപാലിന്റെ പരസ്യ പ്രതികരണം.
