തിരുവനന്തപുരം: സംസ്ഥാനത്തെ സർക്കാർ ആശുപത്രികളിൽ മരുന്നുകൾക്ക് ക്ഷാമമില്ലെന്ന നിലപാട് ആവർത്തിച്ച് ആരോഗ്യമന്ത്രി കെ. മുരളീധരൻ. ചില മരുന്നുകളുടെ ലഭ്യതയിൽ മാത്രമാണ് നേരിയ കുറവുള്ളത്. ആകെ 18 ഇനം മരുന്നുകളുടെ കുറവാണ് നിലവിലുള്ളതെന്നും, ഇവ ഒരാഴ്ചയ്ക്കുള്ളിൽ വിതരണ കേന്ദ്രങ്ങളിൽ ലഭ്യമാക്കാനുള്ള എല്ലാ നടപടികളും സ്വീകരിച്ചിട്ടുണ്ടെന്നും അദ്ദേഹം വ്യക്തമാക്കി.

പ്രതിപക്ഷത്തിന്റെ വിമർശനങ്ങൾക്ക് മറുപടിയുമായി രംഗത്തെത്തിയ മന്ത്രി, 2500 കോടി രൂപയുടെ കടം ബാക്കിവെച്ച് പോയവരാണ് ഇപ്പോൾ സർക്കാരിനെ കുറ്റപ്പെടുത്താൻ വരുന്നതെന്ന് തിരിച്ചടിച്ചു. മരുന്നുകൾ വാങ്ങാൻ ആവശ്യമായ പണം കണ്ടെത്തേണ്ടതുണ്ട്. സാധാരണക്കാർക്ക് ലഭ്യമാകാത്ത എന്തെങ്കിലും മരുന്നുകളുണ്ടെങ്കിൽ ചൂണ്ടിക്കാണിച്ചാൽ ഉടൻ തന്നെ ലഭ്യമാക്കാനുള്ള വഴി ഒരുക്കും. നിലവിലുള്ള 18 ഇനം മരുന്നുകളുടെ ലഭ്യതക്കുറവ് ഉടൻ പരിഹരിക്കും; ഇതിനായി കൃത്യമായ നിർദ്ദേശങ്ങൾ നൽകിക്കഴിഞ്ഞു. ഒരാഴ്ച കഴിഞ്ഞ് ഏതൊക്കെ മരുന്നുകളാണ് ലഭിക്കാത്തതെന്ന് അറിയിച്ചാൽ അപ്പോൾത്തന്നെ പരിഹാരമുണ്ടാക്കുമെന്നും അദ്ദേഹം പറഞ്ഞു.

ഗുണനിലവാരമില്ലാത്ത ചില കമ്പനികളിൽ നിന്ന് മരുന്നുകൾ വാങ്ങില്ലെന്ന് മന്ത്രി കർശന നിലപാടെടുത്തു. കഴിഞ്ഞ പത്ത് വർഷത്തിനിടയിൽ വലിയ രീതിയിലുള്ള അഴിമതികൾ നടത്തിയ മരുന്ന് വിതരണക്കാരുണ്ട്. ഡോക്ടർമാരും ഉദ്യോഗസ്ഥരും ഇത്തരം കമ്പനികളും തമ്മിൽ പാമ്പൻ പാലത്തേക്കാൾ ശക്തമായ രഹസ്യ കൂട്ടുകെട്ടുണ്ട്. താൻ ഈ സ്ഥാനത്തിരിക്കുമ്പോൾ അത്തരം കൊള്ളരുതായ്മകൾക്ക് കൂട്ടുനിൽക്കില്ല. വ്യാജ പ്രചാരണങ്ങളിലൂടെ മരുന്ന് ക്ഷാമമുണ്ടെന്ന് വരുത്തിതീർക്കുന്നത് ഇത്തരം കമ്പനികളാണ്; ഇവരുടെ മരുന്നുകൾക്ക് യാതൊരു നിലവാരവുമില്ലെന്നും അദ്ദേഹം ചൂണ്ടിക്കാട്ടി. ആരോഗ്യവകുപ്പിന്റെ പ്രവർത്തനം പൂർണ്ണമായി നേരെയാക്കിയ ശേഷമേ താൻ പടിയിറങ്ങുകയുള്ളൂ എന്നും മന്ത്രി കൂട്ടിച്ചേർത്തു.

കെഎംഎസ്‌സിഎൽ (KMSCL) നേതൃത്വത്തിൽ ഉദ്യോഗസ്ഥനില്ലെന്ന ആരോപണത്തിനും അദ്ദേഹം മറുപടി നൽകി. ചുമതലയേൽക്കാൻ ആളെ നിയോഗിച്ചിരുന്നെങ്കിലും അദ്ദേഹം സ്ഥാനം ഏറ്റെടുത്തില്ല. അനുയോജ്യനായ വ്യക്തിയെ ഈ പദവിയിലേക്ക് കണ്ടെത്തുന്നതുമായി ബന്ധപ്പെട്ട് മുഖ്യമന്ത്രിയുമായി നേരിട്ട് ചർച്ച നടത്തിയിട്ടുണ്ടെന്ന് ആരോഗ്യമന്ത്രി അറിയിച്ചു.