തിരുവനന്തപുരം: തിരുവിതാംകൂർ ദേവസ്വം ബോർഡ് പ്രസിഡന്റുമായി ഉടലെടുത്ത ഭിന്നതകളിൽ ദേവസ്വം വകുപ്പ് മന്ത്രി കെ. മുരളീധരനെതിരെ കടുത്ത വിമർശനവുമായി മുൻ മന്ത്രി കടകംപള്ളി സുരേന്ദ്രൻ. ദേവസ്വം മന്ത്രിക്ക് രാഷ്ട്രീയ അന്ധതയാണെന്നും ഈ വിഷയത്തെ സർക്കാർ രാഷ്ട്രീയ മുതലെടുപ്പിനായി ഉപയോഗിക്കുകയാണെന്നും അദ്ദേഹം കുറ്റപ്പെടുത്തി. ദേവസ്വം ബോർഡ് പ്രസിഡന്റിന്റെ കസേര ലക്ഷ്യമിട്ട് കുപ്പായം തയ്ച്ചു കാത്തിരിക്കുന്ന ചിലർ രംഗത്തുണ്ടെന്നും ട്വന്റിഫോറിന് നൽകിയ പ്രത്യേക പ്രതികരണത്തിൽ അദ്ദേഹം ചൂണ്ടിക്കാട്ടി.
കക്ഷിരാഷ്ട്രീയ താല്പര്യങ്ങളോടെ കാര്യങ്ങളെ സമീപിക്കുന്ന സ്വഭാവക്കാരനല്ല ഇപ്പോഴത്തെ ദേവസ്വം ബോർഡ് പ്രസിഡന്റെന്ന് കടകംപള്ളി സുരേന്ദ്രൻ വ്യക്തമാക്കി. അദ്ദേഹത്തെ പൊതുമധ്യത്തിൽ അപമാനിക്കാനാണ് ദേവസ്വം മന്ത്രി തുനിയുന്നത്. ഈ നിലപാട് തിരുത്താൻ മന്ത്രി തയ്യാറാകണമെന്ന് അദ്ദേഹം ആവശ്യപ്പെട്ടു. എല്ലാറ്റിനെയും മോശമാക്കി ചിത്രീകരിച്ച് സ്വന്തമാക്കാനുള്ള തന്ത്രമാണ് സർക്കാരിന്റേത്. ബോർഡ് പ്രസിഡന്റിന്റെ അധികാരങ്ങളെയും വ്യക്തിത്വത്തെയും ഇടിച്ചുതാഴ്ത്തരുതെന്നും അദ്ദേഹം പറഞ്ഞു.
അതേസമയം, വിഷയത്തിൽ മുഖ്യമന്ത്രി നേരിട്ട് ഇടപെട്ടതോടെ ദേവസ്വം മന്ത്രി കെ. മുരളീധരനും ബോർഡ് പ്രസിഡന്റും തമ്മിലുണ്ടായിരുന്ന ഭിന്നതകൾക്ക് അയവു വന്നിട്ടുണ്ട്. മന്ത്രി കെ. മുരളീധരനുമായി ഇന്ന് കൂടിക്കാഴ്ച നടത്തുന്ന പ്രസിഡന്റ് കെ. ജയകുമാർ, മണ്ഡല മകരവിളക്ക് തീർത്ഥാടന കാലവുമായി ബന്ധപ്പെട്ട് പൂർത്തിയാക്കിയ മുന്നൊരുക്കങ്ങൾ ധരിപ്പിക്കും. ഇതിനു പുറമെ തിരുവിതാംകൂർ ദേവസ്വം ബോർഡിന്റെ നിർണ്ണായക യോഗവും ഇന്ന് ചേരുന്നുണ്ട്.
