തിരുവനന്തപുരം: സംസ്ഥാനത്തെ വൈദ്യുതി ഉപഭോഗം എക്കാലത്തെയും ഉയർന്ന നിരക്കിലേക്ക് കുതിക്കുന്നു. പീക്ക് സമയങ്ങളിൽ ഉപഭോക്താക്കൾ ഉപയോഗം സ്വയം നിയന്ത്രിക്കണമെന്ന് കെ.എസ്.ഇ.ബി നിർദ്ദേശിച്ചു. ഉയർന്ന തോതിൽ ഊർജ്ജം ആവശ്യമുള്ള വ്യാവസായിക യൂണിറ്റുകൾ തങ്ങളുടെ പ്രധാന പ്രവർത്തനങ്ങൾ പകൽ സമയത്തേക്ക് പുനഃക്രമീകരിക്കണമെന്ന് ആവശ്യപ്പെട്ട് സർക്കാർ ഉത്തരവ് പുറപ്പെടുവിച്ചു. വാട്ടർ ഹീറ്ററുകൾ, ഇൻഡക്ഷൻ കുക്കറുകൾ, വാഷിംഗ് മെഷീനുകൾ, പമ്പ് സെറ്റുകൾ എന്നിവ ഉൾപ്പെടെ ഉയർന്ന അളവിൽ വൈദ്യുതി വലിച്ചെടുക്കുന്ന ഉപകരണങ്ങളുടെ പ്രവർത്തനം പരമാവധി സൗരോർജ്ജം ലഭ്യമാകുന്ന പകൽ സമയങ്ങളിലേക്ക് മാറ്റണമെന്നും നിർദ്ദേശമുണ്ട്.

സർക്കാർ സ്ഥാപനങ്ങളിലും ഓഫിസുകളിലും വൈദ്യുതി ഉപയോഗം ചുരുക്കാൻ നിർദ്ദേശം കൈമാറിയിട്ടുണ്ട്. എയർകണ്ടീഷണറുകളുടെ താപനില 25 ഡിഗ്രി സെൽഷ്യസിന് മുകളിൽ മാത്രമേ ക്രമീകരിക്കാവൂ. അനാവശ്യമായ അലങ്കാര വിളക്കുകളും അധിക വെളിച്ച സംവിധാനങ്ങളും ഒഴിവാക്കണം. വാട്ടർ അതോറിറ്റിയുടെ പമ്പിംഗ് ജോലികൾ പകൽ സമയത്ത് മാത്രമായി പരിമിതപ്പെടുത്തണമെന്നും ഉത്തരവിലുണ്ട്. കഴിഞ്ഞ ദിവസം രാത്രി സംസ്ഥാനത്തിന് ആവശ്യമായ വൈദ്യുതി ലഭ്യമായതിനാൽ രാത്രി 9 മണിക്ക് ശേഷം നിയന്ത്രണങ്ങൾ ഏർപ്പെടുത്തേണ്ടി വന്നില്ല.

വേ ഗ്ലോബൽ ഇന്ത്യ പ്രൈവറ്റ് ലിമിറ്റഡ് എന്ന കമ്പനിയിൽ നിന്നും ഇന്ന് മുതൽ 200 മെഗാവാട്ട് വൈദ്യുതി അധികമായി ലഭിച്ചു തുടങ്ങും. വൈകുന്നേരം 6 മണി മുതൽ അർദ്ധരാത്രി 12 മണി വരെയുള്ള പീക്ക് സമയങ്ങളിലായിരിക്കും ഈ വൈദ്യുതി ലഭ്യമാകുക. അടുത്ത മാസം 31 വരെ ഊർജ്ജം ലഭ്യമാകുന്ന തരത്തിലാണ് ഈ കരാർ ഒപ്പിട്ടിട്ടുള്ളത്. യൂണിറ്റിന് 11 രൂപ നിരക്കിലാണ് ഈ വൈദ്യുതി വാങ്ങുന്നത്. മഴ പെയ്തതും താപനില കുറഞ്ഞതും നിലവിലെ ഉപയോഗത്തിൽ നേരിയ ഇടിവുണ്ടാക്കിയിട്ടുണ്ട്. എന്നിരുന്നാലും, ഇന്നും വൈദ്യുതി നിയന്ത്രണം ഉണ്ടായേക്കാൻ സാധ്യതയുണ്ടെന്ന് കെ.എസ്.ഇ.ബി വ്യക്തമാക്കി.