തിരുവനന്തപുരം: ആഭ്യന്തര മന്ത്രി രമേശ് ചെന്നിത്തലയുടെ അമേരിക്കൻ പര്യടനവുമായി ബന്ധപ്പെട്ട് സോഷ്യൽ മീഡിയയിൽ കുറിപ്പിട്ട സി.പി.ഐ.എം നേതാവ് അഡ്വ. കെ.എസ്. അരുൺ കുമാറിനെതിരെ പോലീസ് കേസെടുത്ത നടപടിക്കെതിരെ ആഞ്ഞടിച്ച് പ്രതിപക്ഷ നേതാവ് പിണറായി വിജയൻ. പോലീസിനെ ആയുധമാക്കി രാഷ്ട്രീയ വിയോജിപ്പുകളെ ഭയപ്പെടുത്തി നിശ്ശബ്ദമാക്കാമെന്നത് വ്യാമോഹം മാത്രമാണെന്നും, ഇത്തരം അധികാര വിരട്ടലുകൾ കണ്ട് ഭയപ്പെടുന്നവരല്ല സംസ്ഥാനത്തെ പ്രബുദ്ധ ജനതയെന്നും അദ്ദേഹം ഓർമ്മിപ്പിച്ചു. അരുൺ കുമാറിന് അദ്ദേഹം പൂർണ്ണ ഐക്യദാർഢ്യം പ്രഖ്യാപിക്കുകയും ചെയ്തു.
ജനാധിപത്യപരമായ ചോദ്യങ്ങളെയും തിരുത്തലുകളെയും അധികാരത്തിന്റെ ധാർഷ്ട്യം ഉപയോഗിച്ച് നേരിടുന്ന സ്വേച്ഛാധിപത്യ സമീപനമാണ് യു.ഡി.എഫ് സർക്കാർ സ്വീകരിക്കുന്നതെന്ന് മുൻ മുഖ്യമന്ത്രി കുറ്റപ്പെടുത്തി. സംസ്ഥാനത്തിന്റെ ആഭ്യന്തര വകുപ്പ് മന്ത്രിയുടെ വിദേശയാത്രയെ ആസ്പദമാക്കി സാമൂഹിക മാധ്യമങ്ങളിൽ തികച്ചും പ്രസക്തമായ ചില സംശയങ്ങൾ ഉന്നയിച്ചതിനാണ് സഖാവ് കെ.എസ്. അരുൺ കുമാറിനെതിരെ ഇപ്പോൾ കേസ് ചുമത്തിയിട്ടുള്ളത്. സർക്കാരിന്റെ ജനാധിപത്യവിരുദ്ധമായ ഈ നീക്കത്തിൽ വിമർശനങ്ങളോടുള്ള കടുത്ത അസഹിഷ്ണുതയാണ് പ്രകടമാകുന്നതെന്ന് അദ്ദേഹം പറഞ്ഞു.
നേരിട്ട് ആഭ്യന്തര മന്ത്രിക്കെതിരെയല്ല, മറിച്ച് ഈ വിവാദത്തിൽ മാധ്യമങ്ങൾ സ്വീകരിച്ച പക്ഷപാതപരമായ നിലപാടുകളെക്കുറിച്ചാണ് അരുൺ കുമാർ ചൂണ്ടിക്കാണിച്ചതെന്നും പിണറായി വിജയൻ വിശദീകരിച്ചു. മുൻപത്തെ എൽ.ഡി.എഫ് ഭരണകാലത്ത് മന്ത്രിമാർ യാത്ര ചെയ്ത വാഹനം വരെ ഭൂതക്കണ്ണാടിയിലൂടെ നിരീക്ഷിച്ച മാധ്യമങ്ങൾ, യു.ഡി.എഫ് മന്ത്രിമാർ വരുമ്പോൾ പുലർത്തുന്ന നിശ്ശബ്ദത വലതുപക്ഷത്തിന് അവർ നൽകുന്ന വഴിവിട്ട ആനുകൂല്യമാണ്. മാധ്യമങ്ങളുടെ ഈ ഇരട്ടത്താപ്പിനെയാണ് അരുൺ കുമാർ തുറന്നുകാട്ടിയത്. രാഷ്ട്രീയമായ വിമർശനങ്ങളെ പോലീസ് നടപടികൾ കൊണ്ട് അടിച്ചമർത്താൻ കഴിയില്ല. ജനങ്ങളുടെ ചോദ്യങ്ങൾക്ക് മുന്നിൽ ഇത്തരം വിരട്ടലുകൾ വിലപ്പോവില്ല. സഖാവ് കെ.എസ്. അരുൺ കുമാറിന് എല്ലാവിധ പിന്തുണയും പ്രഖ്യാപിക്കുന്നുവെന്നും, അഭിപ്രായസ്വാതന്ത്ര്യത്തിന് നേരെയുള്ള കടന്നാക്രമണങ്ങൾക്കും ജനാധിപത്യ ധ്വംസനങ്ങൾക്കുമെതിരെ ശക്തമായ ജനകീയ പ്രതിഷേധം ഉയർന്നുവരണമെന്നും പിണറായി വിജയൻ ആവശ്യപ്പെട്ടു.
