കോഴിക്കോട്: പരിശോധനാ വേളയിൽ രേഖപ്പെടുത്തിയ മൊഴി പിന്നീട് തിരുത്താനോ പിൻവലിക്കാനോ സാധിക്കില്ലെന്ന് എൻഫോഴ്സ്മെന്റ് ഡയറക്ടറേറ്റ് (ഇ.ഡി). കേസിന്റെ വിചാരണാ വേളയിൽ മാത്രമേ ഇത്തരമൊരു നിലപാട് സ്വീകരിക്കാൻ സാദ്ധ്യതയുള്ളൂവെന്നും അന്വേഷണ ഏജൻസി വ്യക്തമാക്കി. സി.എം.ആർ.എൽ–എക്സാലോജിക് സാമ്പത്തിക ഇടപാടുമായി ബന്ധപ്പെട്ട് മന്ത്രി പി.എ. മുഹമ്മദ് റിയാസിന്റെ സുഹൃത്തായ ഹസൻ വാരിസ് നൽകിയ മൊഴി റദ്ദാക്കണമെന്ന ആവശ്യത്തിന്മേലാണ് ഇ.ഡി തങ്ങളുടെ നിലപാട് വ്യക്തമാക്കിയത്.
താൻ നൽകിയ മൊഴി പിൻവലിക്കണമെന്ന ഹസൻ വാരിസിന്റെ ആവശ്യത്തെ ഗൗരവത്തോടെ കാണുന്നില്ലെന്ന് ഇ.ഡി നേരത്തെ തന്നെ സൂചിപ്പിച്ചിരുന്നു. ഇത്തരമൊരു സത്യവാങ്മൂലം സമർപ്പിക്കേണ്ടത് അന്വേഷണ ഏജൻസിക്കല്ലെന്നും, മറിച്ച് വിചാരണ ഘട്ടത്തിൽ കോടതിക്ക് മുൻപാകെയാണെന്നുമാണ് ഇ.ഡിയുടെ വാദം. പി.എം.എൽ.എ സെക്ഷൻ 50 പ്രകാരം ഇ.ഡിക്ക് നൽകുന്ന മൊഴികൾക്ക് നിയമസാധുതയുണ്ടെന്ന് ഏജൻസി ചൂണ്ടിക്കാട്ടി. കൃത്യമായ നിയമപരമായ മാനദണ്ഡങ്ങൾ പൂർണ്ണമായും പാലിച്ചുകൊണ്ടാണ് ഹസൻ വാരിസിനെ ചോദ്യം ചെയ്തതെന്നും അവർ കൂട്ടിച്ചേർത്തു.
അന്വേഷണ ഉദ്യോഗസ്ഥർ ഭീഷണിപ്പെടുത്തിയത് മൂലമാണ് താൻ മുഹമ്മദ് റിയാസിനെതിരെ മൊഴി നൽകേണ്ടി വന്നതെന്നായിരുന്നു ഹസ്സൻ വാരിസിന്റെ വെളിപ്പെടുത്തൽ. മകളെ കേസിൽ പ്രതിയാക്കുമെന്ന് ഉദ്യോഗസ്ഥർ ഭയപ്പെടുത്തിയതിനാലാണ് അങ്ങനെ പറഞ്ഞതെന്ന് വാരിസ് സത്യവാങ്മൂലത്തിൽ ആരോപിച്ചിരുന്നു. കഴിഞ്ഞ മാസം 18-ാം തീയതിയായിരുന്നു കോഴിക്കോട്ടുള്ള ഹസ്സൻ വാരിസിന്റെ വസതിയിൽ ഇ.ഡി ഉദ്യോഗസ്ഥർ പരിശോധന നടത്തിയത്.
റിയാസിന്റെ പക്കലുള്ള കള്ളപ്പണം ദുബായിൽ കഴിയുന്ന ഫൈജാസിന് എത്തിക്കുന്നതിനായി വാരിസ് ഇടനിലക്കാരനായി പ്രവർത്തിച്ചു എന്നാണ് ഇ.ഡിയുടെ കണ്ടെത്തൽ. വാരിസ് ഒപ്പിട്ടുനൽകിയ മുൻ മൊഴിയിലും ഈ വിവരങ്ങൾ ഉൾപ്പെട്ടിരുന്നു. റിയാസിനെതിരെയുള്ള ഏറ്റവും നിർണ്ണായകമായ രേഖയായാണ് ഇ.ഡി ഈ മൊഴിയെ കണ്ടിരുന്നത്. എന്നാൽ കഴിഞ്ഞ മാസം 20-ാം തീയതി ഈ മൊഴി പിൻവലിക്കുന്നുവെന്ന് കാണിച്ച് വാരിസ് സമർപ്പിച്ച സത്യവാങ്മൂലത്തിനാണ് ഇ.ഡി ഇപ്പോൾ വ്യക്തമായ മറുപടി നൽകിയിരിക്കുന്നത്.
