തിരുവനന്തപുരം: എ.ഐ.സി.സി ആസ്ഥാനത്തും കേരളം ഒഴികെ കോൺഗ്രസ് അധികാരത്തിലുള്ള ഇതര സംസ്ഥാനങ്ങളിലും വന്ദേമാതരം പൂർണ്ണരൂപത്തിൽ ആലപിച്ചതിനെതിരെ രൂക്ഷ വിമർശനവുമായി പ്രതിപക്ഷ നേതാവ് പിണറായി വിജയൻ. കോൺഗ്രസിന്റെ മൃദുഹിന്ദുത്വ നിലപാടുകളെ പൂർണ്ണമായും തുറന്നുകാട്ടുന്ന നടപടിയാണിതെന്ന് അദ്ദേഹം ആരോപിച്ചു. രാജ്യത്തിന്റെ മതനിരപേക്ഷ ദേശീയതയോടല്ല, മറിച്ച് ആർ.എസ്.എസിന്റെ ഹിന്ദുത്വ അജണ്ടകളോടാണ് തങ്ങളുടെ പ്രതിബദ്ധതയെന്ന് കോൺഗ്രസ് ഇതിലൂടെ തെളിയിച്ചിരിക്കുകയാണെന്ന് അദ്ദേഹം ഫേസ്ബുക്ക് കുറിപ്പിലൂടെ വ്യക്തമാക്കി.
എ.ഐ.സി.സി ആസ്ഥാനത്തിന് പുറമെ കോൺഗ്രസ് ഭരിക്കുന്ന കർണാടക, ഹിമാചൽ പ്രദേശ്, തെലങ്കാന എന്നീ സംസ്ഥാനങ്ങളിലെ ഔദ്യോഗിക സ്വാതന്ത്ര്യദിന ചടങ്ങുകളിൽ വന്ദേമാതരത്തിന്റെ പൂർണ്ണരൂപം ആലപിച്ചത് പാർട്ടിയുടെ മൃദുഹിന്ദുത്വ സമീപനത്തിന് അടിവരയിടുന്നതാണെന്ന് അദ്ദേഹം കുറിച്ചു. കേരളത്തിൽ വനംവകുപ്പ് ആസ്ഥാനത്ത് നടന്ന പരിപാടിയിലും സമാനമായ സംഭവം അരങ്ങേറിയത് അതീവ ഗൗരവമുള്ള കാര്യമാണ്. ഇന്ത്യയുടെ മതേതര സ്വഭാവത്തേക്കാൾ ആർ.എസ്.എസിന്റെ ലക്ഷ്യങ്ങളോടാണ് കോൺഗ്രസിന് കൂറെന്ന് യാതൊരു സംശയവുമില്ലാതെ വ്യക്തമായിരിക്കുകയാണ്. നേരത്തെ യു.ഡി.എഫ് സർക്കാരിന്റെ സത്യപ്രതിജ്ഞാ ചടങ്ങിലും വന്ദേമാതരം പൂർണ്ണമായി ആലപിച്ചിരുന്നുവെന്നും അദ്ദേഹം ഓർമ്മിപ്പിച്ചു.
