സോഷ്യൽ മീഡിയ പോസ്റ്റുകൾ നീക്കം ചെയ്യപ്പെട്ടതുമായി ബന്ധപ്പെട്ട വിവാദങ്ങളിൽ ഔദ്യോഗിക വിശദീകരണവുമായി മെറ്റ. ആർട്ടിഫിഷ്യൽ ഇന്റലിജൻസ് (എ.ഐ) സിസ്റ്റം അപ്ഗ്രേഡ് ചെയ്യുന്നതിനിടെ സംഭവിച്ച സാങ്കേതിക തകരാറാണ് ഇതിന് കാരണമെന്നാണ് കമ്പനി വ്യക്തമാക്കിയിരിക്കുന്നത്. നിലവിൽ ഈ പ്രശ്നം പൂർണ്ണമായി പരിഹരിച്ച വിവരം മെറ്റ കേരള പോലീസിന്റെ സൈബർ വിഭാഗത്തെ അറിയിച്ചിട്ടുണ്ട്. ഏതെങ്കിലും വ്യക്തികളുടെയോ ഏജൻസികളുടെയോ നിർദ്ദേശപ്രകാരമല്ല ഉള്ളടക്കങ്ങൾ നീക്കം ചെയ്തതെന്നും മെറ്റയുടെ ഇന്ത്യൻ നോഡൽ ഓഫീസർ വിശദീകരണത്തിൽ വ്യക്തമാക്കുന്നു. നീക്കം ചെയ്യപ്പെട്ട ഉള്ളടക്കങ്ങൾ ഇതിനോടകം പുനഃസ്ഥാപിച്ചതായും ഈ കാര്യം സൈബർ ഓപ്പറേഷൻ വിഭാഗം സ്ഥിരീകരിച്ചതായും അറിയിപ്പിലുണ്ട്.
കേരളത്തിൽ മാത്രമല്ല, രാജ്യത്തെ വിവിധ സംസ്ഥാനങ്ങളിലും സമാനമായ രീതിയിൽ വ്യാപകമായി ഉള്ളടക്കങ്ങൾ നീക്കം ചെയ്യപ്പെടുന്ന സാഹചര്യം ഉണ്ടായിട്ടുണ്ടെന്ന് മെറ്റയുടെ നോഡൽ ഓഫീസർ കേരള പോലീസ് സൈബർ ഓപ്പറേഷൻസ് വിങ്ങിനെ അറിയിച്ചു. സിസ്റ്റത്തിലുണ്ടായ പിഴവ് പൂർണ്ണമായി തിരുത്തിയെന്നും തകരാറുകൾ പരിഹരിച്ച് നീക്കം ചെയ്യപ്പെട്ട എല്ലാ പോസ്റ്റുകളും പൂർവ്വസ്ഥിതിയിലാക്കിയെന്നും മെറ്റ ഔദ്യോഗികമായി വ്യക്തമാക്കി.
