കൊച്ചി: അർജുൻ ആയങ്കിക്കെതിരെയുള്ള നിയമനടപടികൾ കൂടുതൽ കർശനമാക്കാനൊരുങ്ങി പൊലീസ്. കോതമംഗലം എസ്.എച്ച്.ഒയെ ഭീഷണിപ്പെടുത്തിയ സംഭവത്തിൽ ഇയാൾക്കെതിരെ ജാമ്യമില്ലാ വകുപ്പുകൾ കൂടി ഉൾപ്പെടുത്താനാണ് അന്വേഷണ സംഘത്തിന്റെ നീക്കം. കേസിന്റെ ഗൗരവം കണക്കിലെടുത്താണ് പൊലീസിന്റെ ഈ തീരുമാനം. നിലവിൽ അസഭ്യം പറയുക, ഭീഷണിപ്പെടുത്തുക തുടങ്ങിയ കുറ്റങ്ങളാണ് അർജുനെതിരെ ചുമത്തിയിട്ടുള്ളത്. ഇതിനൊപ്പമാണ് ജാമ്യം ലഭിക്കാത്ത വകുപ്പുകൾ കൂടി ചേർക്കുന്നത്.
ഇതിനുപുറമെ, സംഘടിത കുറ്റകൃത്യത്തിന് ഗൂഢാലോചന നടത്തിയ കേസിൽ അർജുൻ ആയങ്കിക്ക് ലഭിച്ച ജാമ്യം റദ്ദാക്കണമെന്നും പൊലീസ് തയ്യാറാക്കിയ റിപ്പോർട്ടിൽ ആവശ്യപ്പെടുന്നുണ്ട്. ഈ റിപ്പോർട്ട് കോതമംഗലം മജിസ്ട്രേറ്റ് കോടതി നാളെ പരിഗണിക്കുന്നതാണ്. അർജുൻ ആയങ്കി ഒരു സ്ഥിരം കുറ്റവാളിയാണെന്ന് കോടതിയെ ബോധിപ്പിച്ചുകൊണ്ടാകും ജാമ്യം റദ്ദാക്കാനുള്ള ആവശ്യം പൊലീസ് ശക്തമായി ഉന്നയിക്കുക.
