തിരുവനന്തപുരത്തും കൊല്ലത്തുമായി കടലിൽ കാണാതായ മത്സ്യത്തൊഴിലാളികളെ കണ്ടെത്താനുള്ള രക്ഷാപ്രവർത്തനം പതിനൊന്നാം ദിവസത്തിലേക്ക് കടന്നു. വിഷയത്തിൽ ഫിഷറീസ് മന്ത്രി വി.ഇ. അബ്ദുൽ ഗഫൂറിന്റെ നേതൃത്വത്തിലുള്ള ഉന്നതതല യോഗം രാവിലെ 11 മണിക്ക് ചേരും. ഇതിനിടെ മന്ത്രിക്കെതിരെ രൂക്ഷവിമർശനവുമായി വിഴിഞ്ഞത്ത് നിന്നും കാണാതായ ജോണിന്റെ മകൾ ജിജി ജോൺ രംഗത്തെത്തി. ഫിഷറീസ് മന്ത്രിക്ക് ഈ വകുപ്പുമായി വല്ല ബന്ധവുമുണ്ടോ എന്നാണ് അവർ ചോദിക്കുന്നത്. വിഷയത്തെക്കുറിച്ച് മന്ത്രിക്ക് യാതൊരു ധാരണയുമില്ലെന്നാണ് ഇതിലൂടെ വ്യക്തമാകുന്നതെന്നും, മാധ്യമങ്ങൾ കാണിക്കുന്ന ആത്മാർത്ഥതയുടെ ഒരംശം പോലും വകുപ്പ് അധികൃതർക്കില്ലെന്നും ജിജി കുറ്റപ്പെടുത്തി.

തനിക്ക് നേരെ ഉയർന്നുവരുന്ന സൈബർ അധിക്ഷേപങ്ങളെക്കുറിച്ചും ജിജി പ്രതികരിച്ചു. താൻ നേരിട്ട് ഇത്തരം സൈബർ ആക്രമണങ്ങൾ കാണുന്നില്ലെങ്കിലും മറ്റുള്ളവർ പറഞ്ഞു വിവരങ്ങൾ അറിയുന്നുണ്ടെന്ന് അവർ വ്യക്തമാക്കി. ഇത്രത്തോളം വിവരമില്ലാത്ത ആളുകൾ കേരളത്തിലുണ്ടോ എന്ന് ചിന്തിച്ചുപോവുകയാണ്. നിങ്ങൾക്ക് ഇത്തരം അവസ്ഥകൾ വരുമ്പോഴും ഇതുപോലെ തന്നെ പറയണം. പത്ത് വർഷം മുൻപായിരുന്നെങ്കിലും എന്റെ പ്രതികരണം ഇങ്ങനെ തന്നെയാകുമായിരുന്നു. സ്വന്തമായി ഇന്റർനെറ്റ് ഉണ്ടെന്ന ഒറ്റക്കാരണത്താൽ വിവരമില്ലായ്മ വെച്ച് എന്തും വിളിച്ചുപറയരുത്. താൻ ഏതെങ്കിലും രാഷ്ട്രീയ പാർട്ടിയുടെ വക്താവല്ല. പത്താം ദിവസമായ ഇന്ന് തങ്ങൾ ബഹളമുണ്ടാക്കിയതിന്റെ പേരിലാണ് ഊർജ്ജിതമായ തിരച്ചിൽ നടക്കുന്നത്. എന്തുകൊണ്ട് ഈയൊരു ഇടപെടൽ ആദ്യ ദിവസം തന്നെ ഉണ്ടായില്ല എന്നതാണ് തന്റെ ചോദ്യമെന്നും ജിജി ജോൺ വ്യക്തമാക്കി.