പയ്യന്നൂർ മണ്ഡലത്തിലെ സ്ഥാനാർത്ഥി നിർണ്ണയത്തിന് പിന്നിലെ കാരണങ്ങൾ വെളിപ്പെടുത്തി സി.പി.ഐ.എം കണ്ണൂർ ജില്ലാ സെക്രട്ടറി കെ.കെ. രാഗേഷ്. വി. കുഞ്ഞികൃഷ്ണൻ ഉന്നയിച്ച ആരോപണങ്ങൾ ശരിയാണെന്ന തരത്തിലുള്ള തെറ്റായ പ്രചാരണങ്ങൾ ഒഴിവാക്കാനാണ് സ്ഥാനാർത്ഥിയെ മാറ്റാതിരുന്നതെന്ന് അദ്ദേഹം വ്യക്തമാക്കി. മധുസൂദനനെ മത്സരരംഗത്തുനിന്ന് മാറ്റിനിർത്തിയിരുന്നെങ്കിൽ ആ ആരോപണങ്ങൾക്ക് വസ്തുതയുണ്ടെന്ന് വ്യാഖ്യാനിക്കപ്പെടുമായിരുന്നു. അത്തരം ഒരു പുകമറ നിലനിൽക്കുന്നത് കൊണ്ടാണ് സ്ഥാനാർത്ഥിയെ മാറ്റാൻ തയ്യാറാകാതിരുന്നതെന്ന് കെ.കെ. രാഗേഷ് കൂട്ടിച്ചേർത്തു. പയ്യന്നൂർ ഡിവൈ.എസ്.പി ഓഫീസിലേക്ക് എൽ.ഡി.എഫ് സംഘടിപ്പിച്ച മാർച്ചിനിടെയായിരുന്നു അദ്ദേഹത്തിന്റെ ഈ പ്രതികരണം.