തിരുവനന്തപുരം: പുനലൂർ ആശുപത്രിയിൽ കോൺഗ്രസ് അനുകൂല സംഘടനയായ എൻ.ജി.ഒ അസോസിയേഷൻ കൊടിയേന്തി സ്വീകരണം നൽകിയ സംഭവത്തെ ന്യായീകരിച്ച് ആരോഗ്യമന്ത്രി കെ. മുരളീധരൻ. താൻ എത്തിയ വേളയിൽ സ്വീകരണമൊന്നും ഉണ്ടായിരുന്നില്ലെന്നും മടങ്ങിപ്പോകുന്ന സമയത്താണ് അഭിവാദ്യം ലഭിച്ചതെന്നും മന്ത്രി വ്യക്തമാക്കി. പുറത്തുനിന്നിരുന്ന ആളുകൾ മഴ കാരണമാണ് കെട്ടിടത്തിനുള്ളിലേക്ക് കയറിയതെന്നും, ഇനിമേൽ ഇത്തരത്തിൽ സംഭവിക്കാൻ പാടില്ലെന്ന് ആശുപത്രി സൂപ്രണ്ടിന് കർശന നിർദ്ദേശം നൽകിയിട്ടുണ്ടെന്നും അദ്ദേഹം പറഞ്ഞു.
ആശുപത്രി കെട്ടിടത്തിനുള്ളിൽ വെച്ച് എൻ.ജി.ഒ അസോസിയേഷൻ ഭാരവാഹികൾ മന്ത്രിയെ എത്തി അഭിവാദ്യം ചെയ്യുന്നതിന്റെ ദൃശ്യങ്ങൾ കഴിഞ്ഞ ദിവസം വലിയ വിവാദങ്ങൾക്ക് വഴിവെച്ചിരുന്നു. ആശുപത്രി പരിസരങ്ങളിൽ കൊടിപിടിച്ചുള്ള രാഷ്ട്രീയ പ്രവർത്തനങ്ങൾ അനുവദിക്കില്ലെന്ന് മുൻപ് പ്രഖ്യാപിച്ച കെ. മുരളീധരൻ, എന്നാൽ ഈ നീക്കത്തെ തടയാതെ നേതാക്കൾ അണിയിച്ച ഷാൾ സന്തോഷത്തോടെ സ്വീകരിക്കുകയും പ്രവർത്തകരുമായി സ്നേഹം പങ്കുവെക്കുകയുമായിരുന്നു.
