കോഴിക്കോട്: എ.ഡി.ജി.പി എസ്. ശ്രീജിത്തിന് ഡി.ജി.പി പദവി നൽകാനുള്ള തീരുമാനത്തിനെതിരെ കടുത്ത വിമർശനവുമായി സമസ്ത രംഗത്തെത്തി. ശ്രീജിത്തിനെ ഡി.ജി.പിയാക്കി ഉയർത്താനുള്ള നീക്കത്തെ തടഞ്ഞ ഹൈക്കോടതിയുടെ നിരീക്ഷണങ്ങൾ അടിസ്ഥാനമാക്കിയാണ് സമസ്തയുടെ ഈ പ്രതികരണം. കോടതി നടത്തിയത് കേവലമൊരു ഔചിത്യബോധത്തോടെയുള്ള മുന്നറിയിപ്പല്ലെന്ന് സമസ്തയുടെ മുഖപത്രമായ 'സുപ്രഭാതത്തിലെ' "ധാർമികത മറക്കുന്ന ഭരണകൂട തിടുക്കങ്ങൾ" എന്ന എഡിറ്റോറിയലിൽ വ്യക്തമാക്കുന്നു. അധികാരത്തിൽ വന്ന് മൂന്ന് മാസം തികയും മുൻപേ തന്നെ വി.ഡി. സതീശൻ സർക്കാരിന് നീതിപീഠത്തിൽ നിന്നും പഴികേൾക്കേണ്ടി വന്നതായും എഡിറ്റോറിയൽ കുറ്റപ്പെടുത്തുന്നു.
ഒട്ടേറെ ആരോപണങ്ങളിൽ നിഴലിൽ നിൽക്കുന്ന വ്യക്തിയെ പോലീസ് സേനയുടെ അമരത്ത് ഇരുത്തുന്നതിലൂടെ പൊതുസമൂഹത്തിന് എന്ത് സന്ദേശമാണ് ഭരണാധികാരികൾ നൽകുന്നതെന്ന് പത്രം ചോദിക്കുന്നു. രണ്ടാം പിണറായി വിജയൻ സർക്കാരിന്റെ കാലഘട്ടത്തിലാണ് ഷിനു ചൊവ്വ, ചിത്തരേശൻ നടേശൻ എന്നിവരെ വളഞ്ഞവഴിയിലൂടെ പോലീസ് സേനയിൽ ചേർത്തത്. ഈ നീക്കങ്ങൾക്ക് നേതൃത്വം നൽകിയതാകട്ടെ എ.ഡി.ജി.പി എസ്. ശ്രീജിത്തുമായിരുന്നു. അന്നത്തെ നിയമനങ്ങളെ ശക്തമായി എതിർത്ത് അന്ന് പ്രതിപക്ഷത്തായിരുന്ന കോൺഗ്രസും യൂത്ത് കോൺഗ്രസും വൻ പ്രതിഷേധങ്ങൾ സംഘടിപ്പിച്ചിരുന്നതായും സുപ്രഭാതം ഓർമ്മിപ്പിക്കുന്നു.
നീതിന്യായ പീഠത്തിൽ നിന്നും ഇത്തരത്തിലുള്ള കടുത്ത പരാമർശങ്ങൾ നേരിടേണ്ടി വരുന്നത് ഒരു ജനാധിപത്യ സർക്കാരിന് ഒരിക്കലും ചേർന്നതല്ലെന്ന് ലേഖനം ചൂണ്ടിക്കാണിക്കുന്നു. ഔദ്യോഗിക ജീവിതം ആരംഭിച്ചത് മുതൽ ഒട്ടനവധി വിവാദങ്ങളിൽ ഉൾപ്പെട്ട ഉദ്യോഗസ്ഥനാണ് എസ്. ശ്രീജിത്ത്. സംശയാസ്പദമായ പശ്ചാത്തലമുള്ള വ്യവസായികളുമായുള്ള വഴിവിട്ട ബന്ധങ്ങളും നടി ആക്രമിക്കപ്പെട്ട കേസ് അട്ടിമറിക്കാൻ നടത്തിയ ദുരൂഹമായ ഇടപെടലുകളും ഇയാൾക്കെതിരെ ഉന്നയിക്കപ്പെട്ടിട്ടുണ്ട്. ഇതിനുപുറമേ, കണ്ണൂർ പാലത്തായി പീഡനക്കേസ് ക്രൈംബ്രാഞ്ച് അന്വേഷിച്ച വേളയിൽ സംഘത്തലവനായിരുന്ന എസ്. ശ്രീജിത്ത് പോക്സോ നിയമവകുപ്പുകൾ ഒഴിവാക്കി ഭാഗികമായ കുറ്റപത്രം സമർപ്പിച്ചതിനെ തുടർന്ന് കേസിലെ പ്രതിയായ ബി.ജെ.പി നേതാവ് കുനിയിൽ പത്മരാജന് പെട്ടെന്ന് ജാമ്യം ലഭിക്കാൻ വഴിയൊരുക്കിയെന്ന ആരോപണവും പത്രം ചൂണ്ടിക്കാട്ടുന്നു.
സർവീസ് രേഖകളിൽ നിരന്തരം കറുത്ത പുള്ളികൾ വീണ ഒരു ഉദ്യോഗസ്ഥനെ സംരക്ഷിച്ചു നിർത്താനും പോലീസ് അധ്യക്ഷനാക്കാനും യു.ഡി.എഫ് സർക്കാർ കാണിക്കുന്ന തിടുക്കം കേരളീയ പൊതുസമൂഹം അംഗീകരിക്കുമോ എന്ന് സുപ്രഭാതം ആശങ്കപ്പെടുന്നു. ജനങ്ങളുടെ ശക്തമായ ഭരണവിരുദ്ധ വികാരമാണ് എൽ.ഡി.എഫിന്റെ ചരിത്രപരമായ തകർച്ചയ്ക്ക് കാരണമെന്ന് സി.പി.ഐ.എം നേതൃത്വം തന്നെ തുറന്നുസമ്മതിക്കുമ്പോൾ, കാൽവർഷം പോലും തികയും മുൻപ് വി.ഡി. സതീശൻ സർക്കാരും പിണറായി സർക്കാർ വെട്ടിത്തെളിച്ച അതേ ദുർമാർഗ്ഗം തെരഞ്ഞെടുക്കുകയാണെന്നും എഡിറ്റോറിയൽ വിമർശിക്കുന്നു.
പത്തു വർഷത്തോളം ജനങ്ങൾ മാറ്റിനിർത്തിയ ശേഷം വലിയ ജനവിധിയോടെയാണ് തങ്ങളെ വീണ്ടും ഭരണത്തിലേറ്റിയതെന്ന ബോധം യു.ഡി.എഫ് ഭരണാധികാരികൾക്ക് ഉണ്ടായിരുന്നാൽ അത് അവർക്ക് ഗുണം ചെയ്യുമെന്ന് എഡിറ്റോറിയൽ മുന്നറിയിപ്പ് നൽകുന്നു. ജനങ്ങൾ വെറുത്തു തള്ളിയവരെ വീണ്ടും താഴെയിറക്കാൻ പൊതുജനങ്ങൾക്ക് അധികം പ്രയാസപ്പെടേണ്ടി വരില്ലെന്ന സത്യം ഭരണകൂടം ഇനിയും തിരിച്ചറിഞ്ഞില്ലേ എന്നും പത്രം ചോദിക്കുന്നു.
