സംസ്ഥാനത്ത് തുടരുന്ന കനത്ത മഴക്കെടുതിയിൽ കെ.എസ്.ഇ.ബിക്ക് ഇതുവരെ 25.43 കോടി രൂപയുടെ സാമ്പത്തിക നഷ്ടം രേഖപ്പെടുത്തി. മഴയും കാറ്റും കാരണം വകുപ്പിന്റെ 2,892 ട്രാൻസ്ഫോർമറുകളെ ബാധിച്ചതോടെ ആകെ 6,56,770 ഉപഭോക്താക്കളുടെ വൈദ്യുതി വിതരണമാണ് നിലച്ചത്.
പ്രകൃതിദുരന്തത്തിൽ 349 ഹൈ ടെൻഷൻ (HT) ഇലക്ട്രിക് പോസ്റ്റുകളും 2,599 ലോ ടെൻഷൻ (LT) പോസ്റ്റുകളും തകർന്നുപോയിട്ടുണ്ട്. ഇതിനുപുറമേ 233 ട്രാൻസ്ഫോർമറുകൾ പൂർണ്ണമായും വെള്ളത്തിനടിയിലായി.
ഇപ്പോഴും 63,676 ഉപഭോക്താക്കൾക്ക് വൈദ്യുതി ബന്ധം പൂർണ്ണമായി പുനഃസ്ഥാപിച്ചു നൽകാനുണ്ട്. വിച്ഛേദിക്കപ്പെട്ട വൈദ്യുതി ലൈനുകൾ പൂർവ്വസ്ഥിതിയിലാക്കാൻ യുദ്ധകാലാടിസ്ഥാനത്തിലുള്ള ശ്രമങ്ങൾ നടന്നു വരികയാണെന്ന് കെ.എസ്.ഇ.ബി അറിയിച്ചു. വൈദ്യുതി തടസ്സം ഏറ്റവും സങ്കീർണ്ണമായി ബാധിച്ചിരിക്കുന്നത് കണ്ണൂർ, പത്തനംതിട്ട ജില്ലകളിലെ ജനങ്ങളെയാണ്.
