തിരുവനന്തപുരം: സംസ്ഥാനത്തെ മഴക്കെടുതികൾ നേരിടുന്നതിൽ സർക്കാർ സംവിധാനങ്ങളുടെ ഏകോപനത്തിൽ വലിയ വീഴ്ചയാണ് സംഭവിച്ചിരിക്കുന്നതെന്ന് മുൻമന്ത്രി പി. രാജീവ്. നിലവിലെ അടിയന്തര സാഹചര്യത്തിൽ മുഖ്യമന്ത്രി വി.ഡി. സതീശൻ സ്വീകരിക്കേണ്ട സമീപനം ഇതല്ലെന്നും, ഇക്കാര്യത്തിൽ മുൻ സർക്കാരിന്റെ പ്രവർത്തന രീതികൾ അദ്ദേഹത്തിന് പരിശോധിക്കാവുന്നതാണെന്നും രാജീവ് ചൂണ്ടിക്കാട്ടി. ജനങ്ങൾ പ്രകൃതിദുരന്തത്തിൽ ദുരിതമനുഭവിക്കുമ്പോൾ വിരുന്ന് സൽക്കാരങ്ങൾക്കും ഉദ്ഘാടന പരിപാടികൾക്കും പോകുന്നത് ശരിയായ നടപടിയല്ല. ഈ കാര്യങ്ങളെല്ലാം പൊതുസമൂഹം കൃത്യമായി വിലയിരുത്തുന്നുണ്ടെന്ന ബോധ്യം മുഖ്യമന്ത്രിക്ക് ഉണ്ടാകണമെന്നും അദ്ദേഹം ഓർമ്മിപ്പിച്ചു.
"മുഖ്യമന്ത്രി പോകുന്ന സ്ഥലങ്ങളിലെല്ലാം അദ്ദേഹത്തോടൊപ്പം ഉന്നത ഉദ്യോഗസ്ഥർക്കും അനുഗമിക്കേണ്ടി വരും. അങ്ങനെയുള്ള സാഹചര്യത്തിൽ ദുരിതാശ്വാസ പ്രവർത്തനങ്ങൾ ആരാണ് ഏകോപിപ്പിക്കുക? പുറത്ത് ഗ്യാലറിയിൽ ഇരുന്ന് കളി കാണുന്നതുപോലെയല്ല നേരിട്ട് കളത്തിലിറങ്ങി കളിക്കുന്നത്," പി. രാജീവ് കുറ്റപ്പെടുത്തി.
മുഖ്യമന്ത്രിയുടെ വിവാദമായ ഹെലികോപ്റ്റർ യാത്രയെക്കുറിച്ചും അദ്ദേഹം പ്രതികരിച്ചു. മുമ്പ് ഇടതുപക്ഷ സർക്കാർ ഹെലികോപ്റ്റർ ഉപയോഗിച്ച സമയത്ത് അതിനെ ധൂർത്തായി ചിത്രീകരിച്ച വ്യക്തിയാണ് ഇപ്പോഴത്തെ മുഖ്യമന്ത്രിയെന്നും, അദ്ദേഹം പഴയ വാക്കുകൾ ഒന്നോർക്കുന്നത് നന്നായിരിക്കുമെന്നും പി. രാജീവ് പരിഹസിച്ചു. എന്നിരുന്നാലും, പരസ്പരം വിവാദങ്ങൾ സൃഷ്ടിക്കുന്നതിന് പകരം കേരളം ഒന്നാകെ ഒറ്റക്കെട്ടായി നിന്ന് പ്രതിസന്ധിയെ നേരിടേണ്ട സമയമാണിതെന്നും അദ്ദേഹം കൂട്ടിച്ചേർത്തു.
