ഇ. ശ്രീധരൻ സർക്കാരിന് മുന്നിൽ സമർപ്പിച്ച അതിവേഗ റെയിൽപാതാ നിർദേശം സംസ്ഥാന സർക്കാരിന്റെ വിദഗ്ധ സമിതി പൂർണ്ണമായും തള്ളി. ഈ പദ്ധതി അതിന്റെ ഇപ്പോഴത്തെ മാതൃകയിൽ പ്രാവർത്തികമാക്കാൻ സാധിക്കില്ലെന്ന വിവരം സമിതി കേന്ദ്ര സർക്കാരിനെയും ശ്രീധരനെയും ഔദ്യോഗികമായി അറിയിച്ചുകഴിഞ്ഞു. രാജ്യസഭയിൽ ജോൺ ബ്രിട്ടാസ് എം.പി ഉന്നയിച്ച ചോദ്യത്തിന് റെയിൽവേ മന്ത്രാലയം നൽകിയ മറുപടിയിലാണ് ഇക്കാര്യം വ്യക്തമാക്കിയത്.
ഇ. ശ്രീധരൻ തയ്യാറാക്കിയ തിരുവനന്തപുരം - കണ്ണൂർ ഹൈസ്പീഡ് റെയിൽവേ പദ്ധതിയാണ് നിലവിലുള്ള രൂപത്തിൽ പ്രായോഗികമല്ലെന്ന് സർക്കാർ നിയോഗിച്ച വിദഗ്ധ സമിതി വിലയിരുത്തിയത്. കേരളത്തിലെ റെയിൽവേ വികസനത്തിനായി നേരത്തെ തന്നെ തീരുമാനിച്ചിട്ടുള്ള മറ്റ് പദ്ധതികൾ നിലവിലുണ്ടെന്നും, വിവാദമായ സിൽവർ ലൈൻ പദ്ധതി സംസ്ഥാന സർക്കാർ ഉപേക്ഷിച്ചതായും കേന്ദ്ര മന്ത്രാലയം മറുപടിയിൽ ചൂണ്ടിക്കാട്ടി.
മണിക്കൂറിൽ 200 കിലോമീറ്റർ വേഗത ലക്ഷ്യമിട്ടുള്ള അതിവേഗ റെയിൽപാതാ പദ്ധതിയായിരുന്നു ഇ. ശ്രീധരൻ സർക്കാരിന് മുൻപാകെ സമർപ്പിച്ചിരുന്നത്. ആകെ 473 കിലോമീറ്റർ യാത്രാദൂരമുള്ള ഈ നിർദിഷ്ട പദ്ധതിയിൽ 23 സ്റ്റേഷനുകളായിരുന്നു ഉൾപ്പെടുത്തിയിരുന്നത്.
