കനത്ത മഴയെത്തുടർന്നുള്ള ദുരിതാശ്വാസ പ്രവർത്തനങ്ങളിലും മുന്നറിയിപ്പുകൾ നൽകുന്നതിലും സംസ്ഥാന സർക്കാരിന് വലിയ വീഴ്ച സംഭവിച്ചതായി സിപിഐഎം മുഖപത്രമായ ദേശാഭിമാനിയുടെ വിമർശനം. ദുരിതാശ്വാസ നടപടികൾ ഏകോപിപ്പിക്കാൻ ആളില്ലാത്തതിനാൽ സംസ്ഥാനത്ത് നാഥനില്ലാത്ത അവസ്ഥയാണെന്ന് മുഖപ്രസംഗം ചൂണ്ടിക്കാട്ടുന്നു. വ്യാപകമായി മഴക്കെടുതികൾ ഉണ്ടായ സമയത്ത് വിവിധ ജില്ലകളിലായി സ്വന്തം സ്വകാര്യ പരിപാടികളിൽ പങ്കെടുക്കുന്ന തിരക്കിലായിരുന്നു മുഖ്യമന്ത്രിയെന്നും പത്രം കുറ്റപ്പെടുത്തുന്നു.
മലപ്പുറത്തെ വിരുന്ന് സൽക്കാരത്തിലും ക്ഷേത്ര ദർശനങ്ങളിലും മുഖ്യമന്ത്രി ശ്രദ്ധ കേന്ദ്രീകരിച്ചതിനെതിരെ സമൂഹ മാധ്യമങ്ങളിൽ ഇടതുപക്ഷ പ്രൊഫൈലുകൾ നേരത്തെ തന്നെ രംഗത്തുവന്നിരുന്നു. ഇതിന്റെ തുടർച്ചയായാണ് ദേശാഭിമാനിയിലും വിമർശനം പ്രത്യക്ഷപ്പെട്ടിരിക്കുന്നത്. സ്വന്തം ആവശ്യങ്ങൾക്കായി മുഖ്യമന്ത്രി ഹെലികോപ്റ്റർ ഉപയോഗിച്ചതിനെതിരെയും കടുത്ത പ്രതിഷേധമുയരുന്നുണ്ട്. മഴക്കെടുതികൾ കൈകാര്യം ചെയ്യുന്നതിൽ നിലവിലെ സർക്കാർ പൂർണ്ണ പരാജയമാണെന്നും മുൻ സർക്കാരുമായി താരതമ്യം ചെയ്തുകൊണ്ടുമാണ് ഈ വിമർശനങ്ങൾ ഉയർന്നുവരുന്നത്.
കഴിഞ്ഞദിവസങ്ങളിലുണ്ടായ കനത്ത മഴയെക്കുറിച്ചും അപകടങ്ങളെക്കുറിച്ചുമുള്ള വിവരങ്ങൾ മാധ്യമപ്രവർത്തകരോട് വിശദീകരിക്കാൻ പോലും മുഖ്യമന്ത്രി വി.ഡി. സതീശൻ തയ്യാറായില്ലെന്നും മുഖപ്രസംഗത്തിൽ കുറ്റപ്പെടുത്തുന്നുണ്ട്. മഴക്കാലത്തിന് മുന്നോടിയായി നടക്കേണ്ട ശുചീകരണ പ്രവർത്തനങ്ങളും പൂർണ്ണമായും താളംതെറ്റി. അതിവേഗം പ്രതികരിക്കേണ്ട സർക്കാർ സംവിധാനങ്ങൾ നിശ്ചലമായെന്നും സംസ്ഥാനത്ത് നാഥനില്ലാത്ത സ്ഥിതിവിശേഷമാണെന്നും ലേഖനം വ്യക്തമാക്കുന്നു. ഇതിനുപുറമെ, ദുരിതാശ്വാസ ക്യാമ്പുകളിൽ കഴിയുന്നവർക്ക് അവശ്യസാധനങ്ങൾ എത്തിച്ചുനൽകാൻ പോലും സർക്കാരിന് സാധിക്കുന്നില്ലെന്നും മുഖപ്രസംഗത്തിൽ പറയുന്നു.
