മിൽമയുമായി ബന്ധപ്പെട്ട് ഉയർന്ന അഴിമതി ആരോപണങ്ങളിൽ വിശദമായ അന്വേഷണം നടത്തുമെന്ന് മന്ത്രി ബിന്ദു കൃഷ്ണ. ശബരിമലയിലേക്കുള്ള നെയ്യ് വിതരണത്തിൽ നടന്ന ക്രമക്കേടുകളും ഈ അന്വേഷണത്തിന്റെ പരിധിയിൽ വരും. നിലവിൽ ഈ വിഷയത്തിൽ വിജിലൻസ് അന്വേഷണം പുരോഗമിക്കുന്നുണ്ടെങ്കിലും, സമാന്തരമായി കൂടുതൽ സമഗ്രമായ ഒരു അന്വേഷണം അനിവാര്യമാണെന്ന് മന്ത്രി ചൂണ്ടിക്കാട്ടി. ഇതിനായി ഷീബ കൈമൾ അധ്യക്ഷയായുള്ള ഒരു മൂന്നംഗ സമിതിക്ക് രൂപം നൽകിയിട്ടുണ്ട്.
മഹാരാഷ്ട്രയിൽ നിന്നും പാൽ ശേഖരിച്ചതുമായി ബന്ധപ്പെട്ട കാര്യങ്ങളും ശബരിമല നെയ്യ് വിതരണത്തിലെ തിരിമറിയും സമിതി വിശദമായി പരിശോധിക്കും.അഴിമതിക്ക് തിരുവിതാംകൂർ ദേവസ്വം ബോർഡിലെ ഉദ്യോഗസ്ഥരുടെ എന്തെങ്കിലും സഹായം ലഭിച്ചിട്ടുണ്ടെന്ന് കണ്ടെത്തിയാൽ കർശനമായ നടപടികൾ സ്വീകരിക്കുമെന്നും മന്ത്രി കൂട്ടിച്ചേർത്തു.
