തമിഴ്നാട്ടിലെ സർക്കാർ ആശുപത്രികളിൽ ജനിക്കുന്ന നവജാതശിശുക്കൾക്ക് ഒരു ഗ്രാം തൂക്കമുള്ള സ്വർണ്ണമോതിരവും ഒപ്പം ബേബി കിറ്റും സൗജന്യമായി വിതരണം ചെയ്യുന്ന 'തായ്മാമൻ തങ്കമോതിരം' പദ്ധതി മുഖ്യമന്ത്രി സി. ജോസഫ് വിജയ് ഇന്ന് നാടിന് സമർപ്പിക്കും. മധുര രാജാജി സർക്കാർ ആശുപത്രിയിൽ ഉച്ചയ്ക്ക് 12 മണിക്കാണ് പദ്ധതിയുടെ ഉദ്ഘാടന ചടങ്ങ് നിശ്ചയിച്ചിരിക്കുന്നത്. 2026 ജൂൺ 22 മുതൽ സർക്കാർ ആശുപത്രികളിൽ ജനിച്ച കുഞ്ഞുങ്ങൾക്ക് ഈ പദ്ധതിയുടെ ആനുകൂല്യം ലഭിച്ചുതുടങ്ങും.
നേരത്തെ സെപ്റ്റംബർ 15-ന് ആരംഭിക്കാൻ നിശ്ചയിച്ചിരുന്ന ഈ സംരംഭം, മുഖ്യമന്ത്രിയുടെ വിദേശ പര്യടനം മുൻനിർത്തി ഇന്നത്തേക്ക് മാറ്റിവെക്കുകയായിരുന്നു. പദ്ധതി നടത്തിപ്പിലേക്കായി പ്രതിവർഷം 755.83 കോടി രൂപയാണ് വകയിരുത്തിയിരിക്കുന്നത്. വിതരണം ചെയ്യുന്ന സ്വർണ്ണത്തിന്റെ ഗുണനിലവാരത്തിൽ ഒട്ടും വിട്ടുവീഴ്ചയുണ്ടാകില്ലെന്നും 916 ഹോൾമാർക്കുള്ള സ്വർണ്ണമാണ് നൽകുന്നതെന്നും ആരോഗ്യവകുപ്പ് മന്ത്രി കെ.ജി. അരുൺരാജ് നേരത്തെ വ്യക്തമാക്കിയിരുന്നു.
അതേസമയം, ഉപതിരഞ്ഞെടുപ്പ് നടക്കുന്ന സാഹചര്യമുള്ളതിനാൽ ചെങ്കൽപേട്ട്, തിരുപ്പൂർ എന്നീ ജില്ലകളിൽ പദ്ധതി നിലവിൽ പ്രാബല്യത്തിൽ വരില്ല. ഉദ്ഘാടന കർമ്മത്തിന് ശേഷം മധുരയിലെ നവീകരിച്ച ഗാന്ധി മ്യൂസിയം മുഖ്യമന്ത്രി പൊതുജനങ്ങൾക്കായി തുറന്നുകൊടുക്കും. തുടർന്ന് പ്രസിദ്ധമായ മധുര മീനാക്ഷി ക്ഷേത്രത്തിൽ ദർശനം നടത്തിയ ശേഷമായിരിക്കും സി. ജോസഫ് വിജയ് മടങ്ങുക.
