ന്യൂഡൽഹി: ആം ആദ്മി പാർട്ടിയുടെ ഇപ്പോഴത്തെ നീക്കങ്ങൾ പിരിഞ്ഞുപോയ കാമുകിയുടെ പെരുമാറ്റത്തിന് സമാനമാണെന്ന പരിഹാസവുമായി രാജ്യസഭാ എം.പി രാഘവ് ഛദ്ദ. ഡൽഹിയിലെ വോട്ടർ പട്ടികയിൽ രാഘവ് ഛദ്ദയുടെ പേര് ഉൾപ്പെടുത്തിയത് സംബന്ധിച്ച് എ.എ.പി ചോദ്യങ്ങൾ ഉന്നയിച്ച പശ്ചാത്തലത്തിലായിരുന്നു എം.പിയുടെ ഈ പ്രതികരണം. മുൻകാല ബന്ധത്തിൽ നിന്ന് പൂർണ്ണമായി മുക്തമാകാൻ കഴിയാത്ത പഴയ കാമുകിയെപ്പോലെയാണ് എ.എ.പിയുടെ അവസ്ഥയെന്ന് അദ്ദേഹം പറഞ്ഞു. പാർട്ടിയുടെ ചിന്ത ഇപ്പോഴും തന്നെ ചുറ്റിപ്പറ്റിയാണെന്നും, തന്നിൽ നിന്നുള്ള വേർപിരിയൽ ഉൾക്കൊള്ളാനാവാതെ അവർ ചിലപ്പോൾ കൈഞരമ്പ് മുറിച്ച് ആത്മഹത്യയ്ക്ക് പോലും മുതിർന്നേക്കാമെന്നും ഛദ്ദ പരിഹസിച്ചു.
ഡൽഹി വോട്ടർ പട്ടികയിലേക്ക് രാഘവ് ഛദ്ദയുടെ പേര് ചേർത്തതുമായി ബന്ധപ്പെട്ട നടപടിക്രമങ്ങളിൽ തിരഞ്ഞെടുപ്പ് കമ്മീഷനോട് ആം ആദ്മി പാർട്ടി വിശദീകരണം ആവശ്യപ്പെട്ടതിന് പിന്നാലെയാണ് ഈ വാക്പോര് ഉടലെടുത്തത്. ഇതുമായി ബന്ധപ്പെട്ട 'ഫോം 6' പരസ്യമാക്കണമെന്നും പൊതുജനങ്ങൾക്ക് പരാതികളും ആക്ഷേപങ്ങളും സമർപ്പിക്കാൻ അവസരമൊരുക്കണമെന്നും പാർട്ടി കമ്മീഷനോട് ആവശ്യപ്പെട്ടിരുന്നു. രാഘവ് ഛദ്ദ എവിടെവെച്ച്, ഏത് തീയതിയിലാണ് ഫോം 6 പ്രകാരമുള്ള അപേക്ഷ നൽകിയതെന്ന് തിരഞ്ഞെടുപ്പ് കമ്മീഷൻ വ്യക്തമാക്കണമെന്ന് എ.എ.പിയുടെ ദേശീയ മാധ്യമ ചുമതലയുള്ള അനുരാഗ് ദണ്ഡ ആവശ്യപ്പെട്ടു. സെപ്റ്റംബർ ഒന്ന് മുതൽ ഏഴ് വരെയുള്ള തീയതികളിൽ ലഭിച്ച ഫോം 6 അപേക്ഷകളുടെ കൂട്ടത്തിൽ ഛദ്ദയുടെ പേര് ഉണ്ടായിരുന്നില്ലെന്ന് രാജീന്ദർ നഗർ നിയമസഭാ മണ്ഡലത്തിലെ രേഖകൾ നിരത്തി ദണ്ഡ ചൂണ്ടിക്കാട്ടിയിരുന്നു.
ഓഗസ്റ്റ് 31-ന് പുറത്തിറക്കിയ കരട് വോട്ടർ പട്ടികയിൽ 746-ാം ക്രമനമ്പർ വരെയുള്ള വിവരങ്ങൾ മാത്രമാണ് ഉൾപ്പെട്ടിരുന്നത്. എന്നാൽ നവംബർ 4-ന് അന്തിമ പട്ടിക പ്രസിദ്ധീകരിക്കാനിരിക്കെ, 747-ാമതായി ഛദ്ദയുടെ പേര് എങ്ങനെ കടന്നുകൂടി എന്ന് ദണ്ഡ സംശയം പ്രകടിപ്പിച്ചു. ഛദ്ദ ഡൽഹിയിൽ ഫോം 6 സമർപ്പിച്ചിട്ടുണ്ടെങ്കിൽ സാധാരണക്കാരായ പൗരന്മാരുടെ കാര്യത്തിൽ പാലിക്കാറുള്ളതുപോലെ തിരഞ്ഞെടുപ്പ് കമ്മീഷൻ ആ വിവരം പൊതുജനങ്ങൾക്ക് ലഭ്യമാക്കണമെന്നും പരാതികൾ ഉന്നയിക്കാൻ അവസരം നൽകണമെന്നും ദണ്ഡ ആവശ്യപ്പെട്ടു.
