ന്യൂഡൽഹി: അപകടാവസ്ഥയിലുള്ള നിർമ്മിതികൾക്കും അനധികൃത കെട്ടിടങ്ങൾക്കുമെതിരെ നടപടികൾ കടുപ്പിച്ച് ഡൽഹി മുൻസിപ്പൽ കോർപ്പറേഷൻ (എം.സി.ഡി). നഗരത്തിലെ 12 സോണുകൾ കേന്ദ്രീകരിച്ച് നടത്തിയ പരിശോധനകളിൽ 41 കെട്ടിടങ്ങൾ പൊളിച്ചുനീക്കാൻ ഉത്തരവിടുകയും 61 എണ്ണം പൂട്ടി മുദ്രവെക്കുകയും (സീൽ ചെയ്യുകയും) ചെയ്തു. ഇതിനുപുറമെ, ചട്ടലംഘനം കണ്ടെത്തിയ 32 പേയിംഗ് ഗസ്റ്റ് (പി.ജി) കേന്ദ്രങ്ങൾക്ക് കാരണം കാണിക്കൽ നോട്ടീസ് നൽകുകയും മൂന്ന് കെട്ടിടങ്ങൾക്ക് പൊളിക്കൽ നോട്ടീസ് കൈമാറുകയും ചെയ്തിട്ടുണ്ട്.

കഴിഞ്ഞ ദിവസങ്ങളിലും കോർപ്പറേഷൻ സമാനമായ രീതിയിൽ ശക്തമായ ഇടപെടലുകൾ നടത്തിയിരുന്നു. കെട്ടിട നിർമ്മാണ മാനദണ്ഡങ്ങൾ കാറ്റിൽപ്പറത്തിയതിന് മുൻപ് 46 കെട്ടിടങ്ങൾ പൊളിക്കാൻ നിർദ്ദേശം നൽകിയിരുന്നു. അനുമതിയില്ലാത്ത നിർമ്മാണങ്ങൾ, കെട്ടിടങ്ങളുടെ ദുരുപയോഗം, സുരക്ഷിതമല്ലാത്ത നിർമ്മിതികൾ എന്നിവയ്ക്കെതിരെയുള്ള നടപടികൾ വരുംദിവസങ്ങളിലും വിട്ടുവീഴ്ചയില്ലാതെ തുടരുമെന്ന് കോർപ്പറേഷൻ വ്യക്തമാക്കി.

ഡൽഹിയിലെ വിവിധയിടങ്ങളിൽ പ്രവർത്തിക്കുന്ന പി.ജി താമസകേന്ദ്രങ്ങളെക്കുറിച്ച് കോർപ്പറേഷൻ സമഗ്രമായ സർവേ നടത്തിവരികയാണ്. നിലവിൽ 1,355 പി.ജി കെട്ടിടങ്ങളാണ് ഇത്തരത്തിൽ കണ്ടെത്തിയിട്ടുള്ളത്. ഈ കേന്ദ്രങ്ങളിലായി 27,000-ത്തോളം പേർ താമസിക്കുന്നുണ്ടെന്നാണ് വിലയിരുത്തൽ. പി.ജി സംവിധാനങ്ങളെക്കുറിച്ചുള്ള വ്യക്തമായ ഡാറ്റാബേസ് തയ്യാറാക്കുന്നതിനൊപ്പം ഈ കെട്ടിടങ്ങളുടെ ഘടനാപരമായ സുരക്ഷിതത്വവും നിയമസാധുതയും ഉറപ്പുവരുത്തുകയാണ് ഈ പരിശോധനയുടെ ലക്ഷ്യം. നിയമവിരുദ്ധമോ സുരക്ഷിതമല്ലാത്തതോ ആയ കേന്ദ്രങ്ങളിൽ ഇത്തരം ഹോസ്റ്റലുകൾ പ്രവർത്തിക്കുന്നില്ലെന്ന് ഉറപ്പാക്കാൻ ഈ സർവേ റിപ്പോർട്ട് അടിസ്ഥാനമാക്കി തുടർനടപടികൾ സ്വീകരിക്കും. ഹോസ്റ്റലുകൾക്ക് പുറമെ, ബേസ്മെന്റുകളിൽ ചട്ടവിരുദ്ധമായി പ്രവർത്തിച്ചുവന്ന 54 വ്യാപാര സ്ഥാപനങ്ങളും അധികൃതർ സീൽ ചെയ്തു.

സെപ്റ്റംബർ ആറ് ഞായറാഴ്ചയാണ് ആൺകുട്ടികളുടെ പി.ജിയായി പ്രവർത്തിച്ചിരുന്ന 'ഹോസ്റ്റൽ ഡേയ്സ്' എന്ന കെട്ടിടം തകർന്നുവീണത്. നാടിനെ നടുക്കിയ ഈ ദുരന്തത്തിൽ ഏഴ് പേർ മരണപ്പെട്ടിരുന്നു. ആകെ 15 മുറികളുണ്ടായിരുന്ന ഈ കെട്ടിടത്തിലെ ഓരോ മുറിയിലും രണ്ട് മുതൽ മൂന്ന് വിദ്യാർത്ഥികൾ വീതമാണ് താമസിച്ചിരുന്നത്. സത്യ നികേതനിലെ ഈ കെട്ടിടത്തിൽ അനുമതിയില്ലാതെ അധികമായി നിലകൾ പണിതുയർത്തിയതാണ് വൻ തകർച്ചയ്ക്ക് വഴിവെച്ചതെന്ന് പോലീസ് എഫ്.ഐ.ആറിൽ വ്യക്തമാക്കുന്നുണ്ട്.