ഡെഹ്റാഡൂൺ: എ.ഐ.സി.സി അധ്യക്ഷൻ മല്ലികാർജുൻ ഖർഗെ പ്രസംഗിച്ച വേദി ചാണകവെള്ളം തളിച്ച് ശുദ്ധീകരിച്ച നടപടിയെ ന്യായീകരിച്ച് ഉത്തരാഖണ്ഡ് മുഖ്യമന്ത്രി പുഷ്കർ സിങ് ധാമി. കോൺഗ്രസിന്റെ സമ്മേളനത്തിനിടെ ജിഹാദി മുദ്രാവാക്യങ്ങൾ ഉയർന്നതാണ് വേദി ശുദ്ധീകരിക്കാൻ കാരണമായതെന്നാണ് അദ്ദേഹം വ്യക്തമാക്കിയത്. ഓഗസ്റ്റ് എട്ടിനായിരുന്നു ഹൽദ്വാനിയിലെ രാംലീല മൈതാനത്ത് ഖർഗെ പങ്കെടുത്ത കോൺഗ്രസ് റാലി സംഘടിപ്പിച്ചത്. പരിപാടി കഴിഞ്ഞ് രണ്ട് ദിവസങ്ങൾക്ക് ശേഷമായിരുന്നു വേദിയിൽ ശുദ്ധീകരണ ചടങ്ങുകൾ നടന്നത്.
സമ്മേളനത്തിൽ ജിഹാദി മുദ്രാവാക്യങ്ങൾ ഉയർന്ന സാഹചര്യത്തിൽ ഒരു സാമൂഹിക സംഘടനയാണ് മൈതാനം ശുദ്ധീകരിച്ചതെന്നും ഇത് ഏതെങ്കിലും വ്യക്തിയെ ലക്ഷ്യമിട്ടല്ലെന്നും ധാമി പറഞ്ഞു. ഇതിന് മറ്റൊരു വ്യാഖ്യാനമോ രാഷ്ട്രീയ നിറമോ നൽകാൻ ആരെങ്കിലും മുതിർന്നാൽ തങ്ങൾക്കെന്ത് ചെയ്യാൻ സാധിക്കും; ദളിത് വിഭാഗത്തിൽപ്പെട്ടവരും പരിപാടിയിൽ സന്നിഹിതരായിരുന്നിരിക്കെ ഇത് ഒരു പ്രത്യേക വിഭാഗത്തിനെതിരായ നീക്കമാണെന്ന് എങ്ങനെ വ്യാഖ്യാനിക്കാൻ കഴിയുമെന്നും അദ്ദേഹം ചോദിച്ചു. ഹൽദ്വാനി രാംലീല ഗ്രൗണ്ടിൽ നടന്ന ഈ നടപടി വലിയ ചർച്ചയായതിന് ശേഷം ആദ്യമായാണ് മുഖ്യമന്ത്രി 'ജിഹാദി' ആരോപണം ഉന്നയിക്കുന്നത്.
അതേസമയം, ധാമിയുടെ പ്രസ്താവനയ്ക്കെതിരെ അതിശക്തമായ പ്രതിഷേധവുമായി കോൺഗ്രസ് രംഗത്തെത്തി. വരാനിരിക്കുന്ന നിയമസഭാ തിരഞ്ഞെടുപ്പ് മുന്നിൽക്കണ്ട് മുഖ്യമന്ത്രിയും ബി.ജെ.പി നേതൃത്വവും വർഗീയ ധ്രുവീകരണത്തിന് വഴിയൊരുക്കുകയാണെന്ന് കോൺഗ്രസ് സംസ്ഥാന വക്താവ് ഗരിമ ദസൗനി ആരോപിച്ചു. മുഖ്യമന്ത്രിയുടെ വാക്കുകളിൽ യാതൊരു അടിസ്ഥാനവുമില്ല. സംഭവത്തിൽ പോലീസിൽ പരാതി നൽകിയ ആൾ റാലിയിലുടനീളം പങ്കെടുത്തയാളാണ്; അത്തരം മുദ്രാവാക്യങ്ങൾ അവിടെ ഉയർന്നിട്ടേയില്ലെന്ന് അവർ സാക്ഷ്യപ്പെടുത്തുന്നുണ്ടെന്നും ഗരിമ വ്യക്തമാക്കി. മതപരമായ മുദ്രാവാക്യങ്ങൾ വിളിച്ചതിന് ഒരു തെളിവുപോലും ഹാജരാക്കാൻ ബി.ജെ.പിക്ക് സാധിച്ചിട്ടില്ലെന്നും അവർ കൂട്ടിച്ചേർത്തു.
മല്ലികാർജുൻ ഖർഗെയ്ക്കെതിരെയുണ്ടായ ജാതി അധിക്ഷേപ പരാതിയിൽ കേസെടുക്കുന്ന കാര്യം സർക്കാരിന്റെ പരിഗണനയിലില്ലെന്ന് നേരത്തെതന്നെ പുഷ്കർ സിങ് ധാമി വ്യക്തമാക്കിയിരുന്നു. പരിസരത്ത് മാലിന്യം നിക്ഷേപിച്ചതിലും ചിലർ മതപരമായ മുദ്രാവാക്യങ്ങൾ മുഴക്കിയതിലും പ്രതിഷേധിച്ച് പ്രദേശത്തെ ഒരു മതസംഘടന നടത്തിയ ശുചീകരണ പ്രവർത്തനം മാത്രമാണിതെന്നായിരുന്നു വിഷയത്തിൽ സംസ്ഥാന സർക്കാർ നൽകിയ വിശദീകരണം.
