ന്യൂഡൽഹി: രാജ്യത്തിന്റെ വികസന മുന്നേറ്റത്തിനായി പാർലമെന്റിന്റെ വർഷകാല സമ്മേളനം ഫലപ്രദമായി വിനിയോഗിക്കണമെന്ന് പ്രധാനമന്ത്രി നരേന്ദ്ര മോദി ആവശ്യപ്പെട്ടു. സമ്മേളനം ആരംഭിക്കുന്നതിന് മുന്നോടിയായി രാജ്യത്തെ അഭിസംബോധന ചെയ്ത് സംസാരിക്കുകയായിരുന്നു അദ്ദേഹം. കഴിഞ്ഞ ഒരു മാസക്കാലയളവിനുള്ളിൽ ദേശീയവും അന്തർദേശീയവുമായ നിരവധി സുപ്രധാന നേട്ടങ്ങൾ കൈവരിക്കാൻ രാജ്യത്തിന് സാധിച്ചതായി അദ്ദേഹം ചൂണ്ടിക്കാട്ടി.
ഒരു ഇന്ത്യൻ വംശജൻ അന്താരാഷ്ട്ര ബഹിരാകാശ നിലയത്തിൽ എത്തിയതും, രാജ്യത്തെ യുവജനങ്ങളുടെ പ്രയത്നഫലമായുണ്ടായ സംരംഭം ബഹിരാകാശത്ത് ഇന്ത്യൻ പതാക പാറിച്ചതും പ്രധാനമന്ത്രി എടുത്തുപറഞ്ഞു. ആദ്യമായി ബഹിരാകാശയാത്ര നടത്തിയ മലയാളി അനിൽ മേനോനെയും ഇന്ത്യയുടെ പ്രഥമ സ്വകാര്യ റോക്കറ്റായ വിക്രം വണ്ണിനെയും അദ്ദേഹം പ്രത്യേകം അഭിനന്ദിച്ചു. ലോകരാജ്യങ്ങൾക്ക് മുന്നിൽ ഇന്ത്യയുടെ യശസ്സുയർത്തിയ ഈ യുവതലമുറയാണ് ഭാവിയിൽ രാജ്യത്തെ നയിക്കുകയെന്നും മോദി അഭിപ്രായപ്പെട്ടു.
അടുത്തിടെ നാടിന് സമർപ്പിക്കപ്പെട്ട രാജസ്ഥാനിലെ എണ്ണ ശുദ്ധീകരണ ശാല, പുതുതായി സ്ഥാപിച്ച സെമികണ്ടക്റ്റർ പ്ലാന്റ് എന്നിവയെക്കുറിച്ചും അദ്ദേഹം പരാമർശിച്ചു. ലോകത്ത് വിരലിലെണ്ണാവുന്ന രാജ്യങ്ങൾക്ക് മാത്രം സാധ്യമായ ഹൈഡ്രജൻ ട്രെയിൻ ഇന്ത്യയിലും സർവീസ് ആരംഭിച്ചുവെന്ന് അദ്ദേഹം ഓർമ്മിപ്പിച്ചു. രാജ്യത്തിന്റെ വളർച്ച എന്ന ഒറ്റ ലക്ഷ്യത്തിനായി പ്രവർത്തിക്കുന്ന ശാസ്ത്രജ്ഞർ, എഞ്ചിനീയർമാർ, സംരംഭകർ, തൊഴിലാളികൾ എന്നിവരാണ് ഇത്തരം വിജയങ്ങൾക്ക് പിന്നിലെന്നും പ്രധാനമന്ത്രി കൂട്ടിച്ചേർത്തു.
പശ്ചിമേഷ്യയിൽ നടക്കുന്ന സംഘർഷങ്ങളെക്കുറിച്ചും പ്രധാനമന്ത്രി സംസാരിച്ചു. യുദ്ധം കാരണം പെട്രോൾ, ഡീസൽ, എൽപിജി, രാസവളം, ധാതുക്കൾ തുടങ്ങി ഊർജ്ജ മേഖലയിലുൾപ്പെടെ രാജ്യത്ത് വലിയ പ്രതിസന്ധികൾ നേരിടുന്നുണ്ട്. എന്നാൽ ഈ വെല്ലുവിളികൾക്കിടയിലും ആഗോള സമ്പദ്വ്യവസ്ഥയിൽ 7.7 ശതമാനം വളർച്ച നേടാൻ ഇന്ത്യക്ക് കഴിഞ്ഞതായി അദ്ദേഹം വിശദീകരിച്ചു. രാജ്യം അതിവേഗം മുന്നേറുകയാണെന്നും, ഈ കുതിപ്പിന് ഊർജ്ജം പകരുന്നതായിരിക്കണം പാർലമെന്റിന്റെ വർഷകാല സമ്മേളനമെന്നും പ്രധാനമന്ത്രി ആശംസിച്ചു.
