മത്സരങ്ങൾ ഇല്ലാത്ത ഒഴിവുസമയം പ്രയോജനപ്പെടുത്തി ബാങ്ക് ജോലിയിൽ പ്രവേശിച്ച് ഇന്ത്യൻ വിക്കറ്റ് കീപ്പർ ബാറ്റ്സ്മാൻ ഇഷാൻ കിഷൻ. അന്താരാഷ്ട്ര പോരാട്ടങ്ങൾ ഇല്ലാത്ത ഘട്ടമായതിനാലാണ് താരം ബാങ്ക് ജോലിയിൽ പ്രവേശിക്കാൻ നിശ്ചയിച്ചത്. ഓഗസ്റ്റ് 23-ന് ആരംഭിക്കുന്ന ദുലീപ് ട്രോഫി ടൂർണമെന്റിലാണ് അദ്ദേഹം അടുത്തതായി ഗ്രൗണ്ടിലേക്ക് തിരിച്ചെത്തുന്നത്. ഇതിന് മുന്നോടിയായാണ് താരം ജോലിയിൽ ചേർന്നത്. ബാങ്കിലെ സഹപ്രവർത്തകർക്കൊപ്പം ഇഷാൻ എടുത്ത ചിത്രങ്ങൾ ഇതിനോടകം തന്നെ സോഷ്യൽ മീഡിയയിൽ പ്രചരിക്കുന്നുണ്ട്.
റിസർവ് ബാങ്ക് ഓഫ് ഇന്ത്യയുടെ (ആർ.ബി.ഐ) പട്ന ശാഖയിലാണ് 28-കാരനായ ഇഷാൻ കിഷൻ അസിസ്റ്റന്റ് മാനേജരായി സേവനമനുഷ്ഠിക്കുന്നത്. സ്പോർട്സ് ക്വാട്ട വഴിയാണ് അദ്ദേഹത്തിന് ഈ നിയമനം ലഭിച്ചത്. വരാനിരിക്കുന്ന ദുലീപ് ട്രോഫിയിൽ ഈസ്റ്റ് സോൺ ടീമിന്റെ ക്യാപ്റ്റൻ കൂടിയാണ് ഇഷാൻ. താരം നയിക്കുന്ന ഈ ടീമിൽ ഇന്ത്യയുടെ വണ്ടർ കിഡ് വൈഭവ് സൂര്യവംശിയാണ് വൈസ് ക്യാപ്റ്റനായി പ്രവർത്തിക്കുന്നത്. നോർത്ത് ഈസ്റ്റ് സോണിനെതിരെയാണ് ടൂർണമെന്റിൽ ഇഷാന്റെ നേതൃത്വത്തിലുള്ള സംഘത്തിന്റെ ആദ്യ പോരാട്ടം.
