ഇന്ത്യയെ അന്താരാഷ്ട്ര തലത്തിൽ പ്രമുഖ വിനോദസഞ്ചാര കേന്ദ്രമാക്കി ഉയർത്തുന്നതിനായി കേന്ദ്ര വിനോദസഞ്ചാര മന്ത്രാലയം ഇൻഡിഗോ വിമാനക്കമ്പനിയുമായി കരാറിലെത്തി. ഡിജിറ്റൽ-അച്ചടി മാധ്യമങ്ങൾ, വിമാനത്താവളങ്ങളിലെ ബ്രാൻഡിംഗ്, വിമാനത്തിനുള്ളിലെ പ്രചാരണ സംവിധാനങ്ങൾ, സോഷ്യൽ മീഡിയ പ്ലാറ്റ്‌ഫോമുകൾ, അന്താരാഷ്ട്ര ട്രാവൽ എക്‌സിബിഷനുകൾ എന്നിവയിലൂടെ വിപുലമായ പ്രചാരണ പരിപാടികൾ നടപ്പിലാക്കാനാണ് തീരുമാനം. ഇത് സംബന്ധിച്ച ധാരണാപത്രത്തിൽ ഇൻഡിഗോ ഒപ്പുവെച്ചു.

കേന്ദ്ര വിനോദസഞ്ചാര-സാംസ്‌കാരിക വകുപ്പ് മന്ത്രി ഗജേന്ദ്ര സിങ് ഷെഖാവത്തിന്റെ സാന്നിധ്യത്തിലാണ് ധാരണാപത്രം കൈമാറിയത്. മന്ത്രാലയത്തിന്റെ പ്രശസ്തമായ 'ഇൻക്രെഡിബിൾ ഇന്ത്യ' ബ്രാൻഡും ഇൻഡിഗോയുടെ വിപുലമായ ആഭ്യന്തര-അന്താരാഷ്ട്ര സർവീസ് ശൃംഖലയും ഒന്നിക്കുന്നത് രാജ്യത്തിന്റെ ടൂറിസം വികസനത്തിന് വലിയ കരുത്തേകുമെന്ന് അദ്ദേഹം പ്രസ്താവിച്ചു.

ഇത്തരം സഹകരണങ്ങളിലൂടെ ഇന്ത്യയുടെ ടൂറിസം സന്ദേശം ലോകത്തിന്റെ വിവിധ കോണുകളിലുള്ള ആളുകളിലേക്ക് എത്തിക്കാനും, ഭൂഗോളത്തിലെ ഏറ്റവും ആകർഷകമായ വിനോദസഞ്ചാര കേന്ദ്രങ്ങളിലൊന്നായി രാജ്യത്തെ മാറ്റാനും സാധിക്കുമെന്ന് ഷെഖാവത്ത് കൂട്ടിച്ചേർത്തു.

ധാരണാപത്രത്തിന്റെ ഭാഗമായി 'ഇൻക്രെഡിബിൾ ഇന്ത്യ ബൈ ഇൻഡിഗോ' (Incredible India by IndiGo) എന്ന പേരിൽ ആഗോളതലത്തിൽ ആശയവിനിമയ പ്രചാരണം ആരംഭിക്കും. ഇന്ത്യയുടെ സമൃദ്ധമായ സാംസ്‌കാരിക പൈതൃകം, പ്രകൃതിഭംഗി, ആത്മീയ ടൂറിസം, വെൽനസ് ടൂറിസം, സാഹസിക വിനോദസഞ്ചാരം, വന്യജീവി ടൂറിസം തുടങ്ങി രാജ്യത്തിന്റെ വൈവിധ്യമാർന്ന എല്ലാ വിനോദസഞ്ചാര സാധ്യതകളും ഈ പദ്ധതിയിലൂടെ അന്താരാഷ്ട്ര തലത്തിൽ അവതരിപ്പിക്കും.