ഡൽഹി സർക്കാരിന്റെ ജൻ കൗശൽ കേന്ദ്ര സംരംഭത്തിലേക്ക് മലയാളി തിളക്കം. മോത്തി നഗറിൽ മദൻ ലാൽ ഖുറാന ഫൗണ്ടേഷൻ തുടക്കം കുറിച്ച ജൻ കൗശൽ കേന്ദ്രയുടെ ബ്രാൻഡ് അംബാസഡറായി ഇന്ത്യൻ ക്രിക്കറ്റ് താരം സഞ്ജു സാംസൺ ചുമതലയേറ്റു. ഡൽഹി മുഖ്യമന്ത്രി രേഖാ ഗുപ്തയാണ് ഈ നിർണ്ണായക പ്രഖ്യാപനം നടത്തിയത്. വെള്ളിയാഴ്ച സഞ്ജു മുഖ്യമന്ത്രിയുമായി നേരിട്ട് കൂടിക്കാഴ്ച നടത്തിയിരുന്നു. തലസ്ഥാന നഗരിയിലെ യുവതലമുറയെ തൊഴിൽ നൈപുണ്യ വികസനത്തിലേക്കും മികച്ച തൊഴിലവസരങ്ങളിലൂടെ സ്വയംപര്യാപ്തത കൈവരിക്കുന്നതിലേക്കും നയിക്കാനും പ്രചോദിപ്പിക്കാനുമാണ് സഞ്ജുവിനെ ഈ പദവിയിലേക്ക് നിയോഗിച്ചതെന്ന് മദൻ ലാൽ ഖുറാന ഫൗണ്ടേഷൻ വ്യക്തമാക്കി.
മുഖ്യമന്ത്രിയുമായുള്ള സൗഹൃദ സംഭാഷണത്തിനിടെ, സഞ്ജുവിന്റെ സമീപകാലത്തെ മിന്നും പ്രകടനങ്ങളെയും കായികരംഗത്തെ അദ്ദേഹത്തിന്റെ വിലയേറിയ സംഭാവനകളെയും രേഖാ ഗുപ്ത പ്രശംസിച്ചു. ഡൽഹിയിലെ കായിക രംഗത്തിന്റെ പുരോഗതിയെക്കുറിച്ചും യുവാക്കൾക്കിടയിൽ സ്പോർട്സ് സംസ്കാരം വ്യാപിപ്പിക്കുന്നതിനെ സംബന്ധിച്ചും ഇരുവരും ചർച്ച ചെയ്തതായാണ് വിവരം.
സഞ്ജു സാംസണുമൊത്തുള്ള കൂടിക്കാഴ്ചയുടെ ചിത്രങ്ങൾ മുഖ്യമന്ത്രി തന്റെ ഔദ്യോഗിക സോഷ്യൽ മീഡിയ പേജുകളിലൂടെ പങ്കുവെച്ചിട്ടുണ്ട്. ഇന്ത്യൻ ക്രിക്കറ്റിലെ ഏറ്റവും പ്രഗത്ഭനായ യുവതാരങ്ങളിൽ ഒരാളായ സഞ്ജുവിന് ഭാവി മത്സരങ്ങളിൽ തിളക്കമാർന്ന വിജയങ്ങൾ നേടാനാകട്ടെയെന്നും മുഖ്യമന്ത്രി ആശംസിച്ചു. ഡൽഹിയിൽ നടന്ന മത്സരങ്ങൾക്ക് ശേഷമാണ് സഞ്ജു മുഖ്യമന്ത്രിയെ സന്ദർശിക്കാനെത്തിയത്. മുഖ്യമന്ത്രി നൽകിയ വലിയ പിന്തുണയ്ക്കും പ്രോത്സാഹനങ്ങൾക്കും സഞ്ജു സാംസൺ പ്രത്യേകം നന്ദി അറിയിച്ചു.
