സിംബാബ്‌വെക്കെതിരായ ഒന്നാം ട്വന്റി20 മത്സരത്തിലെ തകർപ്പൻ വിജയത്തിന് പിന്നാലെ ടീമിന്റെ കൂട്ടായ പ്രകടനത്തെ അഭിനന്ദിച്ച് ഇന്ത്യൻ നായകൻ ശ്രേയസ് അയ്യർ. കളിക്കാരുടെ മികവിനെ വാനോളം പുകഴ്ത്തിയ നായകൻ, മികച്ച പ്രകടനം കാഴ്ചവെച്ച യുവതാരങ്ങളായ വൈഭവ് സൂര്യവംശിയെയും മായങ്ക് യാദവിനെയും പ്രത്യേകം പരാമർശിച്ചു.

ഇന്ത്യൻ ടി20 ടീമിന്റെ നായകസ്ഥാനം ഏറ്റെടുത്ത ശേഷമുള്ള ആദ്യ ജയത്തിൽ വലിയ സന്തോഷമുണ്ടെന്ന് ശ്രേയസ് വ്യക്തമാക്കി. തന്ത്രങ്ങൾ കളത്തിൽ കൃത്യമായി നടപ്പിലാക്കാൻ ടീമിന് സാധിച്ചു. മായങ്ക് യാദവ് തുടക്കത്തിൽ തന്നെ മികച്ച ബൗളിംഗ് പ്രകടനമാണ് പുറത്തെടുത്തത്. സിംബാബ്‌വെ ബാറ്റ്‌സ്മാർക്ക് റൺസ് നേടാൻ അവസരം നൽകാത്ത വിധം കൃത്യമായ ലൈനിലും ലെങ്തിലുമാണ് അവൻ പന്തെറിഞ്ഞതെന്ന് ശ്രേയസ് ചൂണ്ടിക്കാട്ടി.

മറുപടി ബാറ്റിംഗിനിറങ്ങിയ ഇന്ത്യക്കായി പവർപ്ലേ ഓവറുകളിൽ വൈഭവ് ഉജ്ജ്വല തുടക്കമാണ് നൽകിയത്. നേരത്തെയും ഇവിടെ കളിച്ചിട്ടുള്ളതിനാൽ പിച്ചിന്റെ അവസ്ഥയെക്കുറിച്ച് അവന് വ്യക്തമായ ധാരണയുണ്ടായിരുന്നു. അണ്ടർ-19 ഫൈനൽ പോരാട്ടത്തിൽ 175 റൺസ് നേടിയതിന്റെ അനുഭവസമ്പത്ത് ഗ്രൗണ്ടിലിറങ്ങുമ്പോൾ അവന് വലിയ ആത്മവിശ്വാസം നൽകുന്നുണ്ടെന്നും ശ്രേയസ് കൂട്ടിച്ചേർത്തു.

സിംബാബ്‌വെക്കെതിരായ പോരാട്ടത്തിൽ ഏഴ് വിക്കറ്റുകളുടെ വിജയമാണ് ഇന്ത്യ സ്വന്തമാക്കിയത്. എതിരാളികൾ മുന്നോട്ടുവെച്ച 126 റൺസ് വിജയലക്ഷ്യം മൂന്ന് വിക്കറ്റ് മാത്രം നഷ്ടപ്പെടുത്തി 13.2 ഓവറിൽ ഇന്ത്യ മറികടക്കുകയായിരുന്നു. വെറും 19 പന്തുകളിൽ നിന്ന് അർധസെഞ്ചുറി പൂർത്തിയാക്കിയ വൈഭവ് സൂര്യവംശിയുടെ പ്രകടനമാണ് ഇന്ത്യൻ വിജയത്തിൽ നിർണായകമായത്.