പുതിയ ഭരണകൂടം അധികാരമേറ്റെടുത്ത ശേഷം പുനർജനി കേസിൽ ഒരുവിധത്തിലുള്ള അന്വേഷണവും നടത്തിയിട്ടില്ലെന്ന് മുഖ്യമന്ത്രി വി.ഡി. സതീശൻ വ്യക്തമാക്കി. മുൻ സർക്കാരാണ് കേസിൽ അന്വേഷണം സംഘടിപ്പിച്ചത്. കേസ് ഉയർന്നുവന്ന വേളയിൽ ഇത് രാഷ്ട്രീയ പ്രതികാര നടപടിയാണെന്ന് താൻ ആരോപിച്ചിരുന്നില്ല. പകരം, കേസ് വന്നു താനേ അന്വേഷിക്കട്ടെ എന്ന സമീപനമാണ് താൻ സ്വീകരിച്ചതെന്നും അദ്ദേഹം പറഞ്ഞു. നേരത്തെ തന്നെ അന്വേഷിച്ച് അവസാനിപ്പിച്ച വിഷയം, 2023-ൽ മറ്റൊരു പരാതി വാങ്ങി വീണ്ടും അന്വേഷണവിധേയമാക്കുകയാണുണ്ടായതെന്ന് മുഖ്യമന്ത്രി വിശദീകരിച്ചു.
തുടർന്ന് 2024-ലാണ് വിജിലൻസ് കേസിൽ റിപ്പോർട്ട് സമർപ്പിച്ചത്. അഴിമതി നിരോധന നിയമപ്രകാരം കേസ് നിലനിൽക്കില്ലെന്ന് ഒരു വിജിലൻസ് ഡയറക്ടർ റിപ്പോർട്ട് നൽകുകയുണ്ടായി. അതിനുശേഷമാണ് എഫ്.സി.ആർ.എ (FCRA) ലംഘനം നടന്നിട്ടുണ്ടോ എന്ന് പരിശോധിക്കാൻ ആവശ്യപ്പെട്ടത്. എന്നാൽ എഫ്.സി.ആർ.എ ലംഘനവും ഉണ്ടായിട്ടില്ലെന്ന് രണ്ടാമത്തെ ഡയറക്ടറും റിപ്പോർട്ട് സമർപ്പിച്ചു. ഈ വിവരങ്ങളൊക്കെ ഉണ്ടായിട്ടും തുടർന്നുള്ള നടപടികളൊന്നും സ്വീകരിക്കാതെ വിഷയം മാറ്റിവെക്കുകയായിരുന്നുവെന്ന് മുഖ്യമന്ത്രി പറഞ്ഞു.
അതിനോടൊപ്പം, വിഴിഞ്ഞം ഓഹരി കൈമാറ്റത്തിൽ എംപവേർഡ് റിപ്പോർട്ട് ഇതുവരെ നൽകിയിട്ടില്ലെന്നും അതിൽ ധൃതിപിടിച്ച് തീരുമാനമെടുക്കേണ്ട യാതൊരു സാഹചര്യവുമില്ലെന്നും വി.ഡി. സതീശൻ വ്യക്തമാക്കി. സംസ്ഥാനത്തിന്റെ താല്പര്യങ്ങൾ ബലികഴിക്കാൻ ഒരു കാരണവശാലും അനുവദിക്കില്ലെന്നും അദ്ദേഹം കൂട്ടിച്ചേർത്തു.
