തിരുവനന്തപുരം: കേരളത്തിൽ പെയ്ത കനത്ത മഴയെത്തുടർന്നുണ്ടായ ദുരന്തങ്ങളിൽ വിവിധ വിഭാഗങ്ങൾക്കായി സമഗ്രമായ ധനസഹായ പാക്കേജ് മുഖ്യമന്ത്രി വി.ഡി. സതീശൻ പ്രഖ്യാപിച്ചു. മഴക്കെടുതിയിൽ ജീവൻ നഷ്ടപ്പെട്ടവരുടെ കുടുംബങ്ങൾക്ക് 8 ലക്ഷം രൂപ വീതം നൽകുമെന്ന് അദ്ദേഹം വാർത്താസമ്മേളനത്തിൽ വ്യക്തമാക്കി. വെള്ളം കയറിയ വീടുകളിൽ കഴിയുന്ന കുടുംബങ്ങൾക്ക് അടിയന്തര സഹായമായി 10,000 രൂപയും അനുവദിക്കും. പൂർണ്ണമായി തകർന്നതോ കേടുപാടുകൾ സംഭവിച്ചതോ ആയ വീടുകൾക്ക് 6 ലക്ഷം രൂപയും, വീടും സ്ഥലവും ഒരുപോലെ നഷ്ടപ്പെട്ടവർക്ക് 12 ലക്ഷം രൂപയും ധനസഹായമായി കൈമാറുമെന്നും അദ്ദേഹം അറിയിച്ചു. കൂടാതെ, 1882 ഹെക്ടർ പ്രദേശത്ത് കാർഷിക നാശം സംഭവിച്ചിട്ടുണ്ടെന്നും ഇതിനായി 6.44 കോടി രൂപ സർക്കാർ അനുവദിക്കുമെന്നും മുഖ്യമന്ത്രി വ്യക്തമാക്കി.

രക്ഷാപ്രവർത്തനത്തിനിടെ ജീവൻ വെടിഞ്ഞ ആർ. രാജേഷിന് സംസ്ഥാനത്തിന്റെ ഔദ്യോഗിക ആദരം അർപ്പിക്കുമെന്നും, അദ്ദേഹത്തിന്റെ പൂർത്തിയാവാത്ത  വീടിന്റെ നിർമ്മാണം സർക്കാർ നേരിട്ട് പൂർത്തിയാക്കി നൽകുമെന്നും മുഖ്യമന്ത്രി കൂട്ടിച്ചേർത്തു. നിലവിൽ സംസ്ഥാനത്തിന്റെ വിവിധ ഭാഗങ്ങളിലായി 462 ദുരിതാശ്വാസ ക്യാമ്പുകൾ പ്രവർത്തിക്കുന്നുണ്ട്. ഇതിൽ ആലപ്പുഴ, കോട്ടയം, പത്തനംതിട്ട ജില്ലകളിലാണ് പ്രധാന ക്യാമ്പുകൾ പ്രവർത്തിക്കുന്നത്. 

മഴക്കെടുതിയുമായി ബന്ധപ്പെട്ട് സംസ്ഥാനത്ത് ഇതുവരെ 26 മരണങ്ങൾ സ്ഥിരീകരിച്ചിട്ടുണ്ട്. കൂടാതെ 11 പേർ വിവിധ അപകടങ്ങളിൽപ്പെടുകയും, 4 പേരെ ഇനിയും കണ്ടെത്താനുണ്ടാവുകയും ചെയ്തിട്ടുണ്ടെന്ന് മുഖ്യമന്ത്രി പറഞ്ഞു.

കാലവർഷക്കെടുതി മൂലം സംസ്ഥാനത്ത് മൊത്തം 67.44 കോടി രൂപയുടെ നാശനഷ്ടങ്ങളാണ് ഉണ്ടായിട്ടുള്ളതെന്നാണ് സർക്കാരിന്റെ പ്രാരംഭ കണക്കുകൾ സൂചിപ്പിക്കുന്നത്. വെള്ളക്കെട്ട് കാരണം വീടുകളിലേക്ക് മടങ്ങാനാവാതെ ദുരിതമനുഭവിക്കുന്നവർക്ക്, വീടുകൾ പൂർണ്ണമായി വാസയോഗ്യമായി മാറുന്നത് വരെ ആവശ്യമായ വാടകത്തുക സർക്കാർ നൽകും. അതുപോലെ, ദുരിതബാധിതരായ കുടുംബത്തിലെ രണ്ട് അംഗങ്ങൾക്ക്  ദിവസേന 300 രൂപ വച്ച് പ്രത്യേക അലവൻസായി നൽകുമെന്നും അദ്ദേഹം പ്രഖ്യാപിച്ചു.