തിരുവല്ല മേഖലയിലെ വിവിധ ഭാഗങ്ങളിൽ വെള്ളക്കെട്ടിന്റെ തോത് കുറഞ്ഞുതുടങ്ങി. ഒഴുകിപ്പോകുന്ന വെള്ളം മാന്നാർ, ചെങ്ങന്നൂർ ഭാഗങ്ങളിലേക്കാണ് നീങ്ങുന്നത്. എം. സി. റോഡിലെ തിരുമൂലപുരം ഭാഗത്തെ വെള്ളക്കെട്ട് പൂർണ്ണമായി ഒഴിഞ്ഞിട്ടുണ്ട്. എന്നാൽ നിരണം, പുളിക്കീഴ്, കടപ്ര എന്നീ പ്രദേശങ്ങളിലെ വീടുകളിൽ ഇപ്പോഴും വെള്ളം കെട്ടിക്കിടക്കുന്നുണ്ട്.
കോട്ടയം ജില്ലയിലും പ്രതീക്ഷ നൽകിക്കൊണ്ട് വെള്ളം താണുതുടങ്ങിയിട്ടുണ്ട്. ജില്ലയുടെ പടിഞ്ഞാറൻ മേഖലകളിൽ നിന്നാണ് പ്രളയജലം പ്രധാനമായും ഇറങ്ങിത്തുടങ്ങിയത്.
ആറന്മുളയിലും പ്രളയജലം താഴേക്ക് ഇറങ്ങുകയാണ്. പ്രധാന പാതകളിൽ ഭൂരിഭാഗവും വീണ്ടും ഗതാഗതയോഗ്യമായി മാറി. അതേസമയം, ഉൾപ്രദേശങ്ങളിലെ ചില വഴികൾ ഇപ്പോഴും പ്രളയജലത്തിനടിയിൽ തന്നെയാണ്.
