റെഡ് അലർട്ട് പ്രഖ്യാപിക്കാൻ കാലതാമസം നേരിട്ടുവെന്ന ആരോപണങ്ങൾക്ക് മറുപടിയുമായി സംസ്ഥാന ദുരന്തനിവാരണ അതോറിറ്റി രംഗത്തെത്തി. നിരവധി ശാസ്ത്രീയ പരിശോധനകൾക്കും നിരീക്ഷണങ്ങൾക്കും ശേഷമാണ് മഴ സംബന്ധിച്ച മുന്നറിയിപ്പുകൾ പുറപ്പെടുവിക്കുന്നതെന്ന് ദുരന്തനിവാരണ അതോറിറ്റി സെക്രട്ടറി ഡോ. ശേഖർ കുര്യാക്കോസ് വ്യക്തമാക്കി. വരുന്ന വെള്ളിയാഴ്ചയോടെ വീണ്ടും കനത്ത മഴയ്ക്ക് സാധ്യതയുണ്ടെന്നും മുന്നറിയിപ്പുണ്ട്.
കാലവർഷത്തെ നേരിടാനുള്ള മുന്നൊരുക്കങ്ങൾ കേവലം അലർട്ടുകളെ മാത്രം അടിസ്ഥാനമാക്കിയാകരുതെന്നും ഡോ. ശേഖർ കുര്യാക്കോസ് ചൂണ്ടിക്കാട്ടി. മഴ മുന്നറിയിപ്പുകൾ നൽകുന്ന കാര്യത്തിൽ യാതൊരുവിധ വീഴ്ചയും സംഭവിച്ചിട്ടില്ല. തുടക്കത്തിൽ ഓറഞ്ച് അലർട്ട് പ്രഖ്യാപിക്കുകയും പിന്നീട് സാഹചര്യങ്ങൾക്കനുസരിച്ച് അത് പുതുക്കുകയും ചെയ്യുന്നത് തികച്ചും സ്വാഭാവികമായ പ്രക്രിയയാണ്. റഡാറുകളിൽ നിന്നും ലഭിക്കുന്ന വിവരങ്ങളിലെ വ്യതിയാനങ്ങൾക്കനുസരിച്ച് ഓരോ മൂന്നു മണിക്കൂർ കൂടുമ്പോഴും അലർട്ടുകളിൽ മാറ്റം വന്നേക്കാം. നിലവിൽ അനുഭവപ്പെടുന്ന മഴയുടെ ശക്തി കുറയുമെങ്കിലും ചില പ്രത്യേക ഇടങ്ങളിൽ ഒറ്റപ്പെട്ട കനത്ത മഴ ലഭിച്ചേക്കാമെന്നും അദ്ദേഹം വിശദീകരിച്ചു. എന്നാൽ ഈ പ്രദേശങ്ങൾ ഏതൊക്കെയാണെന്ന് നിലവിൽ കൃത്യമായി നിർവചിക്കുന്നതിൽ ചില സാങ്കേതിക പരിമിതികളുണ്ട്. വെള്ളിയാഴ്ചയോട് അടുത്ത ദിവസങ്ങളിൽ വീണ്ടും ശക്തമായ മഴ പ്രതീക്ഷിക്കാമെന്നും അദ്ദേഹം കൂട്ടിച്ചേർത്തു.
