കൗൺസിലർ ആർ. സുഗതൻ സമർപ്പിച്ച അവധി അപേക്ഷ മേയർ വി. വി. രാജേഷ് ഔദ്യോഗികമായി അംഗീകരിച്ചു. പൗണ്ട് കടവ് വാർഡിൽ നിന്നും കോൺഗ്രസ് സ്വതന്ത്ര സ്ഥാനാർത്ഥിയായി വിജയിച്ച സ്വതന്ത്ര കൗൺസിലർ സുധീഷ് ഉൾപ്പെടെ ആകെ 51 ജനപ്രതിനിധികളുടെ പിന്തുണയാണ് ഭരണപക്ഷത്തിന് ഈ തീരുമാനത്തിന് ലഭിച്ചത്.
സുഗതന് ആറുമാസത്തെ അവധിയാണ് മേയർ പ്രഖ്യാപിച്ചത്. അപേക്ഷയോട് യോജിക്കുന്നവർ കൈകൾ ഉയർത്തി വോട്ട് രേഖപ്പെടുത്താൻ മേയർ ആവശ്യപ്പെട്ടതിനെ തുടർന്ന് സുധീഷ് അടക്കം 51 കൗൺസിലർമാർ പിന്തുണ പ്രഖ്യാപിച്ച് കൈയുയർത്തി.
എന്നാൽ, തീരുമാനത്തിനെതിരെ കടുത്ത പ്രതിഷേധവുമായി യു.ഡി.എഫ്, എൽ.ഡി.എഫ് കൗൺസിലർമാർ നടത്തളത്തിലിറങ്ങി. മേയറുടെ ഡയസിന് മുന്നിൽ തടിച്ചുകൂടിയ പ്രതിപക്ഷാംഗങ്ങൾ ശക്തമായ മുദ്രാവാക്യം വിളികളോടെ ബഹളം വച്ചു. ഈ പ്രതിപക്ഷ ബഹളത്തിനിടയിലും ഡെപ്യൂട്ടി മേയർ നിശ്ചിത അജണ്ടകൾ സഭയിൽ അവതരിപ്പിച്ചു.
യു.ഡി.എഫ് സർക്കാരിന്റെ കൃത്യമായ സർക്കുലർ പ്രകാരമാണ് അവധി അനുവദിച്ചതെന്ന് മേയർ സഭയെ അറിയിച്ചു. 2026-7 മാസം രണ്ടാം തിയതി സർക്കാർ പുറപ്പെടുവിച്ച സർക്കുലർ വായിച്ചുകേൾപ്പിച്ച മേയർ, അവധി അപേക്ഷ വോട്ടെടുപ്പിലൂടെ പാസാക്കിയാൽ കൗൺസിലർക്ക് അവധിയിൽ തുടരാനാകുമെന്ന് സർക്കുലറിൽ വ്യക്തമാക്കുന്നുണ്ടെന്നും കൂട്ടിച്ചേർത്തു.
