പാർലമെന്റിന്റെ വർഷകാല സമ്മേളനം വ്യാഴാഴ്ച പൂർത്തിയാകാനിരിക്കെ, കേന്ദ്ര ആഭ്യന്തരമന്ത്രി അമിത് ഷാക്കെതിരെ നിലപാട് കടുപ്പിക്കുകയാണ് പ്രതിപക്ഷ കക്ഷികൾ. വിദ്യാർത്ഥികൾക്ക് നേരെ നടന്ന പൊലീസ് അതിക്രമത്തിന്റെ പശ്ചാത്തലത്തിൽ ആഭ്യന്തരമന്ത്രി കേവലം പ്രസംഗം നടത്തുകയല്ല, മറിച്ച് വിഷയത്തിൽ ഔദ്യോഗിക പ്രസ്താവന നടത്തുകയാണ് വേണ്ടതെന്ന് ജോൺ ബ്രിട്ടാസ് എം.പി ആവശ്യപ്പെട്ടു. കഴിഞ്ഞ 17 ദിവസമായി ആഭ്യന്തരമന്ത്രി സഭയിൽ എത്തുന്നില്ലെന്നും, ചരിത്രത്തിൽ ഇതാദ്യമായാണ് ഇത്തരമൊരു സാഹചര്യമുണ്ടാകുന്നതെന്നും അദ്ദേഹം ചൂണ്ടിക്കാട്ടി. ഇതിനുപുറമെ അയോധ്യയിലെ സംഭാവന തട്ടിപ്പ്, E20 പെട്രോൾ എന്നീ വിഷയങ്ങളിൽ അടിയന്തര ചർച്ച വേണമെന്നും അദ്ദേഹം കൂട്ടിച്ചേർത്തു.
തുടർച്ചയായ പതിനേഴാം ദിവസവും സഭയിൽ ശക്തമായ പ്രതിഷേധം ഉയർത്താനാണ് പ്രതിപക്ഷത്തിന്റെ തീരുമാനം. വിദ്യാർത്ഥികളുടെ പ്രക്ഷോഭത്തിന് നേരെയുണ്ടായ പൊലീസ് മർദ്ദനത്തിൽ അമിത് ഷാ ഇന്ന് സഭയിൽ പ്രസ്താവന നടത്തുമോയെന്നാണ് രാഷ്ട്രീയ കേന്ദ്രങ്ങൾ ഉറ്റുനോക്കുന്നത്. ഒപ്പം, അയോധ്യ സംഭാവന ക്രമക്കേടുമായി ബന്ധപ്പെട്ട് പ്രധാനമന്ത്രി തന്നെ നേരിട്ട് വിശദീകരണം നൽകണമെന്നും പ്രതിപക്ഷം ഉറച്ചു ആവശ്യപ്പെടുന്നുണ്ട്.
