ന്യൂഡൽഹി: നീറ്റ് ചോദ്യപേപ്പർ ചോർച്ച വിഷയത്തിൽ ഒടുവിൽ പ്രതികരണവുമായി പ്രധാനമന്ത്രി നരേന്ദ്ര മോദി. കേസിൽ കുറ്റക്കാരായവർക്കെതിരെ വേഗത്തിൽ കർശന നടപടിയെടുക്കുന്നതിനായി ഫാസ്റ്റ് ട്രാക്ക് കോടതികൾ സ്ഥാപിക്കുമെന്ന് പ്രധാനമന്ത്രി വ്യക്തമാക്കി. വിഷയത്തിൽ ഉടനടി നടപടികൾ കൈക്കൊള്ളാൻ ബന്ധപ്പെട്ട ഉദ്യോഗസ്ഥർക്ക് നിർദ്ദേശം നൽകിയിട്ടുണ്ടെന്നും അദ്ദേഹം കൂട്ടിച്ചേർത്തു. വിദ്യാർത്ഥികളുടെ താല്പര്യങ്ങൾ സംരക്ഷിക്കുന്നതിന് സർക്കാരിന്റെ ഭാഗത്തുനിന്നുള്ള തുടർനടപടികളുടെ ഭാഗമാണിതെന്നും യുവതലമുറയുടെ ഭാവിയെ അപകടത്തിലാക്കാൻ മുതിരുന്ന ആരെയും വെറുതെ വിടില്ലെന്നും അദ്ദേഹം സോഷ്യൽ മീഡിയയിലൂടെ വ്യക്തമാക്കി.
അതേസമയം, പ്രധാനമന്ത്രിയുടെ ഈ പ്രസ്താവനയ്ക്കെതിരെ തിരിച്ചടിച്ച് ലോക്സഭാ പ്രതിപക്ഷ നേതാവ് രാഹുൽ ഗാന്ധി രംഗത്തെത്തി. രാജ്യത്തെ യുവജനങ്ങളുടെ ഭാവിയെ തകർത്തത് പ്രധാനമന്ത്രി തന്നെയെന്ന് രാഹുൽ ഗാന്ധി ആരോപിച്ചു. വിദ്യാഭ്യാസ മേഖലയുടെ തകർച്ചയ്ക്ക് കൂട്ടുനിൽക്കുക മാത്രമല്ല, അതിന് കാരണക്കാരായ മുഴുവൻ ആളുകളെയും സംരക്ഷിക്കുന്ന നിലപാടാണ് പ്രധാനമന്ത്രി സ്വീകരിച്ചതെന്നും അദ്ദേഹം കുറ്റപ്പെടുത്തി. വിദ്യാർത്ഥികളുടെ ആവശ്യങ്ങൾ തികച്ചും വ്യക്തമാണെന്ന് അദ്ദേഹം ചൂണ്ടിക്കാട്ടി. കേന്ദ്ര വിദ്യാഭ്യാസ മന്ത്രി ധർമ്മേന്ദ്ര പ്രധാനെ രാജിവെപ്പിക്കുക, പ്രക്ഷോഭം നടത്തിയ വിദ്യാർത്ഥികളോട് മാപ്പ് പറയുക, അവർക്കെതിരെ അക്രമം അഴിച്ചുവിട്ടവർക്കെതിരെ കർശന നടപടിയെടുക്കുക എന്നിവയാണ് പ്രധാനമന്ത്രി ചെയ്യേണ്ടതെന്ന് രാഹുൽ ഗാന്ധി തുറന്നടിച്ചു.
