മലപ്പുറം: നിയമസഭാ തിരഞ്ഞെടുപ്പിലെ പാർട്ടിയുടെ പരാജയത്തിന് പ്രധാന കാരണം സ്ഥാനാർത്ഥി നിർണ്ണയത്തിലെ പാളിച്ചകളും വെള്ളാപ്പള്ളി നടേശനും അയ്യപ്പ സംഗമവുമാണെന്ന് മുൻ സ്പീക്കർ എ.എൻ. ഷംസീർ. തുടർ ഭരണത്തിലൂടെ മൂന്നാം വട്ടവും അധികാരത്തിലെത്തുമെന്ന് പ്രതീക്ഷിച്ചിരുന്നു. എന്നാൽ ഇത്തരമൊരു തോൽവി ആരും തന്നെ മുൻകൂട്ടി കണ്ടിരുന്നില്ല. പോസ്റ്റൽ വോട്ടുകൾ എണ്ണിയപ്പോഴുണ്ടായിരുന്ന ലീഡിന് ശേഷം പിന്നീട് എല്ലാം ഒരുമിച്ച് ഒലിച്ചുപോകുന്ന കാഴ്ചയാണ് കണ്ടതെന്നും അദ്ദേഹം വ്യക്തമാക്കി.
മലപ്പുറം ജില്ലയിലെ കാളികാവിൽ സംഘടിപ്പിച്ച കുഞ്ഞാലി രക്തസാക്ഷി ദിനാചരണ ചടങ്ങിൽ സംസാരിക്കവെയായിരുന്നു അദ്ദേഹത്തിന്റെ ശ്രദ്ധേയമായ ഈ വെളിപ്പെടുത്തൽ. അടുത്തിടെ കേന്ദ്രക്കമ്മിറ്റി തങ്ങളുടെ റിപ്പോർട്ടിൽ ചൂണ്ടിക്കാണിച്ച അതേ കാര്യങ്ങൾ തന്നെയാണ് ഷംസീറും ആവർത്തിച്ചത്. എന്നാൽ സംസ്ഥാന നേതൃത്വം ഈ വിലയിരുത്തലുകൾ ഇതുവരെ ഔദ്യോഗികമായി അംഗീകരിച്ചിട്ടില്ല. അയ്യപ്പ സംഗമം പാർട്ടിക്ക് യാതൊരുവിധ ഗുണവും ചെയ്തില്ലെന്ന് മാത്രമല്ല, എസ്.എൻ.ഡി.പി ജനറൽ സെക്രട്ടറി വെള്ളാപ്പള്ളി നടേശനെ കൂടെ നിർത്തിയത് വലിയ തിരിച്ചടിയാവുകയും ചെയ്തു. വെള്ളാപ്പള്ളി നടത്തിയ പ്രസ്താവനകളെയും വിമർശനങ്ങളെയും ശക്തമായി പ്രതിരോധിക്കുന്നതിൽ വീഴ്ചയുണ്ടായെന്നും ഷംസീർ തന്റെ പ്രസംഗത്തിൽ ചൂണ്ടിക്കാട്ടി.
തിരഞ്ഞെടുപ്പ് പടിവാതിൽക്കൽ എത്തിനിൽക്കെ പാർട്ടിയെ വലിയ വിവാദങ്ങളിലേക്ക് വലിച്ചിഴച്ച പയ്യന്നൂർ, തളിപ്പറമ്പ് എന്നിവിടങ്ങളിലെ സ്ഥാനാർത്ഥി നിർണ്ണയം വലിയ അബദ്ധമായിരുന്നുവെന്നും അദ്ദേഹം തുറന്നുസമ്മതിച്ചു. അതേസമയം, ഷംസീറിന്റെ ഈ പരസ്യ പ്രതികരണത്തോട് പാർട്ടിയുടെ സംസ്ഥാന നേതൃത്വം ഇതുവരെ പ്രതികരിക്കാൻ തയ്യാറായിട്ടില്ല.
