കൊച്ചി: തിരുവനന്തപുരം സെക്രട്ടറിയേറ്റിന് മുന്നിൽ സമരം നടത്തുന്ന പി.എസ്.സി ഉദ്യോഗാർത്ഥികൾക്ക് പിന്തുണയുമായി കൂടുതൽ ചലച്ചിത്ര താരങ്ങൾ. ടൊവിനോ തോമസ്, നസ്ലെൻ, ചന്തു സലിംകുമാർ എന്നിവരാണ് സമരത്തിന് ഐക്യദാർഢ്യം പ്രഖ്യാപിച്ച് എത്തിയത്. പി.എസ്.സി റാങ്ക് ലിസ്റ്റിൽ ഉൾപ്പെട്ടിട്ടും നിയമനം ലഭിക്കാത്ത ഉദ്യോഗാർത്ഥികളുടെ സമരത്തിന്റെ ദൃശ്യങ്ങൾ നടൻ ടൊവിനോ തോമസ് സമൂഹമാധ്യമങ്ങളിൽ പങ്കുവെച്ചിട്ടുണ്ട്.
സെക്രട്ടറിയേറ്റിന് മുന്നിൽ അനിശ്ചിതകാല സമരം തുടരുന്നവർക്ക് പൂർണ്ണ പിന്തുണ അറിയിച്ചാണ് താരങ്ങൾ എത്തിയിരിക്കുന്നത്. ദേശീയ തലത്തിലുള്ള വിഷയങ്ങളിൽ മാത്രം പ്രതികരിച്ചാൽ പോരെന്നും സ്വന്തം നാട്ടിലെ ഉദ്യോഗാർത്ഥികളുടെ ന്യായമായ ആവശ്യങ്ങൾ അവഗണിക്കരുതെന്നും നടൻ ചന്തു സലിംകുമാർ സോഷ്യൽ മീഡിയയിൽ കുറിച്ചു. ടൊവിനോ തോമസ് പങ്കുവെച്ച അതേ വീഡിയോ തന്നെയാണ് നസ്ലെനും തന്റെ പേജിൽ പങ്കുവെച്ചിട്ടുള്ളത്.
ഡൽഹിയിലെ സമരങ്ങൾക്ക് പിന്നാലെയാണ് പി.എസ്.സി സമരത്തിനും സിനിമാ മേഖലയിൽ നിന്ന് പിന്തുണയേറുന്നത്. ഈ വിഷയത്തിൽ പ്രതികരണവുമായി അവതാരകയും നടിയായ രഞ്ജിനി ഹരിദാസും രംഗത്തെത്തിയിരുന്നു. പി.എസ്.സി റാങ്ക് ഹോൾഡർമാരുടെ സമരത്തെക്കുറിച്ച് സംസാരിക്കാമോ എന്ന് ചോദിച്ച് തനിക്ക് നിരവധി സന്ദേശങ്ങൾ ലഭിക്കുന്നുണ്ടെന്നും, ഇക്കാര്യത്തിൽ സംസാരിക്കുന്നതിൽ സന്തോഷമേയുള്ളൂവെന്നും രഞ്ജിനി വ്യക്തമാക്കി. ഇൻസ്റ്റഗ്രാം കുറിപ്പിലൂടെയാണ് അവർ ഇക്കാര്യം അറിയിച്ചത്. എന്നാൽ സമരത്തിന്റെ പശ്ചാത്തലത്തെക്കുറിച്ചുള്ള കൃത്യമായ വിവരങ്ങൾ ആവശ്യമാണെന്നും രഞ്ജിനി വ്യക്തമാക്കിയിട്ടുണ്ട്. "ഓൺലൈനിൽ ഇത് സംബന്ധിച്ച് കൂടുതൽ വിവരങ്ങൾ ലഭ്യമല്ല. പ്രതിഷേധത്തിൽ പങ്കെടുക്കുന്നവരിൽ ആരെങ്കിലും ഒരാളോട് നിലവിലെ സാഹചര്യത്തെക്കുറിച്ച് സംസാരിക്കാൻ സാധിക്കുമോ?" എന്നായിരുന്നു രഞ്ജിനിയുടെ ചോദ്യം. ഇവർക്ക് പുറമെ ലിയോണ ലിഷോയ്, ദീപ തോമസ് എന്നിവരും സമരത്തിന് പിന്തുണയുമായി രംഗത്തെത്തിയിട്ടുണ്ട്.
