ന്യൂഡൽഹി: ദേശീയ കൈത്തറി ദിനത്തോടനുബന്ധിച്ച് സോഷ്യൽ മീഡിയയിൽ തരംഗമായ 'ഗെറ്റ് റെഡി വിത്ത് മി' പ്രചാരണത്തിന്റെ ഭാഗമാകാൻ യുവാക്കളോട് പ്രധാനമന്ത്രി നരേന്ദ്ര മോദി ആഹ്വാനം ചെയ്തു. കൈത്തറി വസ്ത്രങ്ങൾ ഉൾപ്പെടുത്തിയുള്ള വീഡിയോകൾ നിർമ്മിച്ച് പങ്കുവെക്കാൻ അഭ്യർത്ഥിക്കുന്ന പുതിയ ഇൻസ്റ്റഗ്രാം റീൽ പ്രധാനമന്ത്രി പോസ്റ്റ് ചെയ്തിട്ടുണ്ട്. ഇന്ത്യയുടെ സമ്പന്നമായ നെയ്ത്ത് പാരമ്പര്യത്തെ പ്രദർശിപ്പിക്കാനും പരമ്പരാഗത കരകൗശല നിർമ്മാണ മേഖലയെ ആശ്രയിക്കുന്ന കുടുംബങ്ങൾക്ക് പിന്തുണ നൽകാനും ഇത് സഹായിക്കുമെന്ന് അദ്ദേഹം വ്യക്തമാക്കി.
ഭാരതത്തിന്റെ കൈത്തറി പാരമ്പര്യത്തെ ആദരിക്കാൻ സർവ്വരും ഒന്നിക്കണമെന്ന് അഭ്യർത്ഥിച്ച മോദി, കൈത്തറി ഉൽപ്പന്നങ്ങൾ വാങ്ങാനും അവ ഉപയോഗിക്കാനും ഏവരെയും പ്രോത്സാഹിപ്പിച്ചു. കൈത്തറി ഉൽപ്പന്നങ്ങൾ തിരഞ്ഞെടുക്കുന്നത് രാജ്യത്തിന്റെ നൂറ്റാണ്ടുകൾ പഴക്കമുള്ള സാംസ്കാരിക പൈതൃകത്തെ സംരക്ഷിക്കുന്നതിനൊപ്പം ലക്ഷക്കണക്കിന് വരുന്ന നെയ്ത്തുകാരുടെ ജീവനോപാധിയെ ശക്തിപ്പെടുത്തുമെന്നും അദ്ദേഹം ഓർമ്മിപ്പിച്ചു. സൗഹൃദ ദിനം എത്രത്തോളം ഊഷ്മളമായി കൊണ്ടാടിയോ അതേപോലെ തന്നെ കൈത്തറി ദിനവും ആഘോഷമാക്കണമെന്ന് പ്രധാനമന്ത്രി പറഞ്ഞു.
