യു.എ.ഇ അടക്കമുള്ള ഗൾഫ് രാജ്യങ്ങളിൽ ഈ വർഷം ശമ്പള വർദ്ധനവ് കുറയാൻ സാധ്യതയെന്ന് റിപ്പോർട്ടുകൾ. മേഖലയിലെ അസ്ഥിരമായ സാമ്പത്തിക സാഹചര്യങ്ങളും പശ്ചിമേഷ്യൻ പ്രതിസന്ധിയുമാണ് ഇതിന് കാരണമായി ചൂണ്ടിക്കാട്ടപ്പെടുന്നത്. എന്നിരുന്നാലും, ശമ്പള വർദ്ധനവ് പൂർണ്ണമായും മരവിപ്പിച്ചിട്ടില്ലെന്നും മികച്ച പ്രകടനം കാഴ്ചവെയ്ക്കുന്ന ജീവനക്കാർക്ക് അർഹമായ പ്രതിഫലം ഇപ്പോഴും നൽകുന്നുണ്ടെന്നും വിലയിരുത്തലുകളുണ്ട്.

സ്വർണ്ണം, എണ്ണ, വജ്രം എന്നീ വിപണികളിലുണ്ടായ അസ്ഥിരതയും ഐ.പി.ഒ (IPO) മേഖലയിലെ മന്ദഗതിയും ബിസിനസ്സ് രംഗത്തെ കാര്യമായി ബാധിച്ചിട്ടുണ്ട്. ഉദ്യോഗാർത്ഥികളുടെ എണ്ണത്തിലുള്ള വർദ്ധനവും നിലവിലെ സാമ്പത്തിക വെല്ലുവിളികളും കാരണം ഗൾഫിൽ വലിയൊരു ശമ്പള വർദ്ധനവ് ഈ വർഷം പ്രതീക്ഷിക്കേണ്ടതില്ലെന്ന് പ്രമുഖ കൺസൾട്ടൻസിയായ 'കൂപ്പർ ഫിച്ച്' വ്യക്തമാക്കുന്നു. നേരത്തെ പ്രവചിക്കപ്പെട്ടിരുന്ന 2.5 മുതൽ 3 ശതമാനം വരെയുള്ള വർദ്ധനവ് ഇനിയുണ്ടാകാൻ സാധ്യതയില്ല. കമ്പനികൾ ചെലവുകൾ ചുരുക്കുന്നതിന്റെ ഭാഗമായി ഉയർന്ന ശമ്പളത്തിനായി ഇടയ്ക്കിടെ ജോലി മാറുന്ന പ്രവണതയ്ക്കും ഇതോടെ കുറവ് വന്നേക്കാം.

എന്നാൽ ഈ സാഹചര്യത്തെ ശമ്പള വിപണിയിലെ പൂർണ്ണമായൊരു സ്തംഭനാവസ്ഥയായി കാണാനാകില്ലെന്ന് റിക്രൂട്ട്‌മെന്റ് സ്ഥാപനമായ 'അഡെക്കോ' അഭിപ്രായപ്പെടുന്നു. കൂടുതൽ അച്ചടക്കമുള്ള ശമ്പള ക്രമീകരണമാണ് ഇപ്പോൾ നടക്കുന്നത്. ഗൾഫ് മേഖലയിലെ കമ്പനികൾ മികച്ച ഉദ്യോഗാർത്ഥികളെ ആകർഷിക്കുന്നതിനും അവരെ നിലനിർത്തുന്നതിനും ഇപ്പോഴും വലിയ പ്രാധാന്യം നൽകുന്നുണ്ട്. സ്ഥാപനത്തിന്റെ വിജയത്തിൽ നിർണായക പങ്കുവഹിക്കുന്നവർക്ക് മികച്ച പ്രതിഫലം ലഭിക്കുന്നുമുണ്ട്. ബിസിനസ്സ് അനുകൂലമായി മുന്നോട്ട് പോകുന്ന സാഹചര്യത്തിൽ, വർഷത്തിന്റെ രണ്ടാം പകുതിയോടെ നിലവിലെ ശമ്പള ഘടന കമ്പനികൾ പുനഃപരിശോധിക്കാനും സാധ്യതയുണ്ട്.